E matuai le mafai lava ona o tatou vaoia o tatou tagata mai le faia poo le faatinoina o vaega e manao ai le loto ae ono tupu mai ai se faafitauli tele ma le mafai ona toe foia pe togafitia, faamaonia lea faamatalaga ina ua silia nei ma le 600 tagata o lo’o aumau i Samoa nei, ua tuuina atu i ai le auaunaga fa’amamatoto talu ona fa’avaeina lenei auaunaga i le tausaga e 2005.
Ae o lo’o maitauina lava le si’itia o gasegase fa’amamatoto fou i tausaga ta’itasi, ma sa ausia le maualuga e 66 gasegase fou i le tausaga fa’aletupe 2022 i le 2023.
“Peitai mai i fa’amaumaugaa le Fa’alapotopotoga Fa’avae Tau Fatuga’o a Samoa, NKFS, ua atagia ai, e lata i le 30% o tagata i totonu o Samoa ua a’afia i gasegase tau fatuga’o,”
“Mai ia lava fa’amaumauga, ua atagia ai, e silia ma le 80% o tagata ua mo’omia le fa’amamatoto, e afua le leaga o fatuga’o ona o a’afiaga o fa’ama’i le pipisi, aemaise ai le gasegase o le suka ma le toto maualuga.
O le aso Tofi o le vaiaso nei na faia ai se sauniga faapitoa e se vaega o le Matagaluega o le Soifua Maloloina e faamanatu aloaia ai le Aso mo fatuga’o i le Lalolagi.
O le afioga i le Minisita, Valasi Luapitofanua To’ogamaga Tafito Selesele sa saunoa e faalauaitele le taua o lea aso, ma avatu ai le fautuaga i le mamalu o le atunuu.
Ae mo tatou tagata ua a’afia ma oo atu i le tulaga 3 i le tulaga 5 le fa’aletonu o a latou fatuga’o, o lo o fa’atino lava e le NKF le auaunaga e tau togafitia ai ia fa’afitauli a e tauave fo’i e le Malo le fa’atupeina o ia togafitiga.
O lo o taumafai nei le Fa’alapotopotoga ina ia o’o atu lea auaunaga mo tagata uma e mo’omia ia togafitiga.
