O loo tupu lava soligatulafono i Samoa

E leai se faiifo ole numera o tagi o loo faamauina ile ofisa o leoleo, e faaulu atu e tagata tafafao mai fafo.

O faasea a tulisi e aofia ai le osofai ma gaoia a latou mea totino ao iai ile tatou atunuu.  “E tatau ona ave iai se faatatau a pulega i fono a nuu, ma taitai o ekalesia.”

Ole finagalo faaalia o le afioga i le Komesina o leoleo, Auapaau Logoitino Filipo, o le mataupu lea e le tatau ona tuu tasi atu i Leoleo.

E tatau ona avea ose mataupu e galulue faatasi uma iai, e faamautinoa le saogalemu o Samoa mo tagata tafafao mai. O le masina talu ai na tatala ai tuaoi o Samoa, ae o loo molimauina o aso uma lava e taunuu ai faasea mai tulisi.

Saunoa le Komesina, e le’o atagia ai ii ni foliga lelei o Samoa. O le finagalo faaalia ole Komesina, na mulia’i mai, ae ei luma atu le faasea faatatau ile tina tulisi ma lana fanau, na osofa’i ma gaoia a latou meatotino ile ao teatea ile taulaga i Apia.

Faapena foi ile aveesea faasolitulafono o mea totino a le au pueata a le Survivor. Ae o  fale tulisi poo Beach resorts o loo lipotia mai le taumafai ai foi o tagata e osofa’i.

Saunoa Auapaau, ile tatau loa ona faamuta na aga.

Aua o leoleo lava tagata e mulimuli ona tali atu i valaau mo le fesoasoani, ae e tatau lava ona faia le galuega a taitai o nuu, ole faamanatu pea , ile atunuu atoa, ma faamalosia faiga o tulafono a nuu foi latou, mo le tuuititia o nei amioaga mataga, pei ona saunoa Auapaau.

Na ia saunoa foi, o tulisi lesi lea o alagatupe ole tamaoaiga o Samoa, ae a faaauau pea nei soligatulafono , ose laasaga e le toe omai ai foi ma tulisi i Samoa, ma tele lava sona aafiaga ile atunuu. O se popolega e le tatau ona tuumamaina e tagata uma, ma faapea ole tiute fai o leoleo.

E aofia uma ai lava ma ave taavale la’u pasese, o fale tulisi, aemaise lava i pulega poo fono a nuu. Afai e mana’o Samoa e siitia lana maketi o tulisi i lesi laasaga iluga atu, ole galulue faatasi lava o tagata uma mai tamaiti i tagata matutua, e ao ona malamalama le mafuaaga ole taua o lenei mataupu.

Ma ia faamanatu mai o le faasalaga o le faaoolima pea faamaonia, e 12 tausaga i le falepuipui, faomea e 10 tausaga ile falepuipui ae o le faaooliima ma le faomea e oo atu i le 14 tausaga ole faasalaga faafalepuipui.