O le silasila a le Ofisa a le loia Sili e leo talafeagai tele le soligatulafono a le susuga ia Peseta Sefululua Pueleo, ua faamaonia ona moliaga o le aumai faanana o oloa faasaina i totonu o le atunuu ao galue ai i le Ofisa o tiute, ma le sala sa tuuina atu e le susuga ia Loau Donald Kerslake e $3,000, ma ia toe apili ai lea mataupu ina ia faaleaogaina lea faasalaga.
O le amataga o le vaiaso nei na tulai ai luma o le faamasinoga maualuga le alii ia Peseta, ina ua tuuina atu le talosaga apili a le loia sili, e faaleaogaina ai le sala o loo taua i luga na tuuina atu e le faamasino ia Fepuari o le tausaga nei.
Peitai o le fofogaina ai la o lenei mataupu i luma o lana afioga ia Leiataualesa Daryl Clark ile Aso Gafua o le vaiaso nei, na faailoa ai le toe iloilo totoa o le faasalaga.
O le auga o le finau a le Ofisa Sili, e tauala atu i le tamaitai loia ia Fuifui Ioane, e tatau ona 6 tausaga e nofosala ai i le falepuipui le alii o Peseta pea fua atu i moliaga e lua ua faamaonia, e aofai ai fualaau faasāina e tusa ma le 900 kalama le mamafa.
E lua vaiaso ua tuuina atu i le loia a Peseta e tuuina mai ai se tali i le talosaga apili.
O Peseta sa avea ma tagata faigaluega o le Ofisa o Tiute i le taimi na faatuatusi mai ai i lona igoa i se faamomoli, sa faanana mai ai le tusa o le 900 kalama le mamafa o fualaau faasaina o le aisa i totonu o ni pusa cereal mai Amerika.
