Ua ave ai le faamalo ma le faafetai a le Minisita o le Matagaluega o tina ma tamaitai le afioga ia Mulipola Anarosa Ale Molioo i itumalo e 21 mai le 51 o itumalo faapalota ua mafai ona saini aloaia i le aso se vaega o le latou poloketi miliona tala lona 2.
Na auai uma sui o fono faavae taitasi ma o latou failautusi ae o faipule e molimauina le isi foi laasaga ua oo atu iai lea foi faamaite taua a le malo.
O itumalo nei e aofia ai, Palauli 2, Faasaleleaga 4, Gagaaemauga 2, Vaimauga 3, Lotofaga, Falealupo, Palauli 1, Aana Alofi 1, Anoamaa 1, Faleata 2, Falealili 2, Safata 1, Anoamaa 2, Faleata 1, Aleipata itupa i luga, Vaimauga 1, Palauli 3, Faleata 4, Siumu, Vaimauga 4, Vaimauga 2.
I le maea ai ona faatino o na sainiga lima sa toe faamanatu e le afioga Mulipola i fono faavae taitasi taiala ma aiaiga o le nei poloketi ia mautinoa ia uia ma faamalieina.
