O le vaiaso nei lea na lagona ai e tina Nofotane a le SVSG, Samoa Victim Support Group, foliga o le susulu atu o o latou foi sao i le faalauiloaina o tu ma agaifanua a Samoa.
Ina ua auai atu ile faamanatuina o le Aso Faapitoa faalevaomalo o fale Mataaga, poo le International Museum Day, ile Mataaga o Samoa i Malifa ile vaiaso nei.
Na talivalaau le Vasega o tina Nofotane a le Toomaga mo e Puapuagatia i tapenaga a le Matagaluega o Aoga Taaloga ma Aganuu.
O ta’ua e le faamatalaga aloaia mai le Toomaga mo e Puapuagatia, ua faaoga ai loa e Nofotane lea valaaulia e faaali ai a latou oloa gaosi, mai laufala, a tina limalima lelei ole faalapotopotoga.
Ua ose avanoa foi e iloa ai e fanau aoga na fesiligia le Nofotane i lona uiga tonu, sa ta’u atu iai, “o tina nei ua sa’oloto mai sauaga , lea ua avea ai ma fetu pupula i o latou aiga, ae o le siosiomaga ma fai foi o latou sao ile tamaoaiga o Samoa.
O le tausaga e 2016, na amata ai le polokalame lea a le SVSG ole faamalosiau i Nofotane e faaoloa i agavaa ma faaauala atu ai se isi togafiti e taofiofia ai sauaga faasaga i tina o Samoa.
Ma fanau mai ai le faaoloaina i tomai eseese ua mafai ai nei e tina nofotane o Samoa ona atinae aiga, ma fai foi o latou leo, amanaia i mea fai, avea oni ta’ita’i.
Ma faafetaia ai e le Afioga a Siliniu Lina Chang, o le Peresetene o le Toomaga le Matagaluega o Aoga Taaloga ma Aganuu, ile avanoa ua maua e Nofotane o Samoa I lea aso faapitoa e faaali tu ma agaifanua ae o oloa taua a Samoa I lona Maota o Mataaga I Malifa ile vaiaso nei.
