Ua a’apa atu ai nei lima fesoasoani o le faletupe a le Bank South Pacific Samoa (BSP) i le sailiga tupe a le Toomaga mo e puapuagati e tauala atu i se seleni tupe e $2,000.
O lenei seleni pei ona saunoa ai le Peresitene o le Toomaga le afioga ia Siliniu o lea fesoasoani lea ma faaapopo i seleni na tau aao muamua atu mo le faamoemoe poo le auga o le sailiga tupe.
E mo le tausiaina o fanau ma faalelei ai nisi o vaega o lo nofoaga oloo aumau ai alo ma fanau ae o tina mafatia.
E le na o le pau ai nei o seleni ua mafai ona ofo atu, aua ua molimauina foi le lagolago a Ekalesia o nuu foi ma sui mai afioaga na sagisagi fiafia e molimoli sina fesoasoani e faailoa ai lo latou alolofa ma le amania o le galuega a le Toomaga.
Peitai o le aso Lulu foi o le vaiaso nei na ofo atu ai e le BSP lava le vaega tupe e $10,000 ma se faatauga o vaega e faaoga i taaloga na faaalu ai le $2,600.
E fesoasoani ai i tapenaga a le au lakapi pa’i a Samoa o lea malaga atu mo le taamilosaga olea faia i le Pacific Game ia Novema o le tausaga nei.
Taua i se pepa o faamatalaga o loo saunoa ai le susuga i le pule ia Maiava Iaeli Tovia-Leota o se taimi muamua lea ua mafai ai ona fesoasoani i le lakapi pa’i i totonu lava o Samoa.
Aua sa na’o taamilosaga ma taaloga a aoga sa mafai ona oo atu ai le lagolago ae o le agaga fiafia e faali le agaga fesoasoani ma le loto alofa ua afua ai ona ofo atu ai loa nei seleni e le gata mo le lakapi ae o le Toomaga mo e puapuagatia.
