Ua sosolo lava le pulega o faasalalauga ole fono a malo ole taupulega, i fono tetele a le lalolagi, pei ona faia i fono a malo aufaatasi, o fono a malo ole taupulega, fono a taitai o malo ole lalolagi, fono a taitai o atunuu o fefaatauaiga a le lalolagi, ile malu puipuia o ana tagata fono, ae ole soona faalauiloaina o ana mataupu talanoaina.
O aiaiga ma tulafono lea ua lima taitaina ai le aufaasalalau a le lalolagi e aofia ai ma Samoa, e manatu le au faasalalau sinia a Samoa, e le tusa aiaiga ma faavae o tusitala ma le aufaasalalau oloo mulimuli ai tusitala o Samoa.
Ua faatonutonu uma e ofisa faasalalau a le malo, ma le ofisa faasalalau faapitoa mai Niu Sila, taualumaga o mataupu tau i ata ma avanoa e ave i tusitala malaga mai ile fono.
E tatau i tusitala uma ona lesitala mo le faamoemoe.
E manatu le peresetene ole JAWS, asosi tusitala a Samoa, Lagi Keresoma, e le tusa ai lea aga ma se malo e pulea faatemokarasi.
Ae manatu le tusitala sinia ia Autagavaia Tumanuvao Galumalemana Tipi Autagavaia, e faapefea ae sese faamatalaga e aumai i tua e tusitala filifilia e faatinoa le galuega, ile malesi i tua, e le tutusa uma manatu o tusitala i mataupu e fia lipoti.
Peita’i ole finagalo faaalia ole Ofisa Sili ole Matagaluega o fesootaiga, Lefaoalii Unutoa Auelua Fonoti o aiaiga mo le aufaasalalau na pasia ane e le Kapeneta.
E na’o le ofisa faasalalau ua filifilia e faatagaina ona pue ata ole fono atoa mai le amataga ile faaiuga, ae ai iai ni manaoga mo faatalanoaga e faia le talosaga.
Ole puipuiga lava o usufono ma mataupu e mama mai i tua.
Peita’i olea iai lava le potu ma vaega faapitoa mo le au faasalalau mai atunuu mamao ma Samoa i Mulinuu, ole nofoaga olea faia ai le fono i lona taimi atoa, ile maota fono ma le maota ole faamasinoga.
E manatu le sui ole Ata Mua News mai Ausetalia, ma Niu Sila, talosia ae iai ni televise ile potu o tusitala e iloa ai taualumaga o mataupu e agavaa iai, e sili atu nai lo le malaga mamao i Samoa ae o atu faasalalau mai faamatalaga a isi ofisa faasalalau ma isi tusitala e leiloa pe sa’o ma faamaoni.
