E tusa ma le 200 tamaiti i le aoga tulaga lua i Vailima na oo atu iai le aao mafola a le faalapotopotoga o le Faith Angel Foundation.
O le faalapotopotoga lea a le Faith Angel Foundation , ua pulupulu lima faatasi ai ni tina talavou, i galuega fesoasoani. O galuega fesoasoani ia na amata fofoa mai ile taimi o aafiaga o Samoa i le misela, sa molimauina ai le mana’omia o fesoasoani aemaise ai ole falemai o tamaiti i Motootua. Sa faatutusa uma lava fanau na avatu iai mealofa pei o diapers, o lavalava tamaiti ma tausiga o aso uma mo fanau mamai ole misela, ae o tusi ata ma tusi faitau.
Peita’i o le Vaiaso nei lea ua amata ai le isi a latou polokalame fou ole Feed the Children. Ua amata ai nei ona faasolo solo atu i aoga le latou fafaga auaua’i o fanau aoga tulagalua.
Na talanoa ai le susuga a Clara Ah Kuoi, o loo taitaia le Misiona lenei, e tele lava aiga o loo mana’omia fesoaosani, ma latou oo atu iai. O tupe o loo fagaioi ai le Faith Angel Fondation, o loo aisi mai fafo ma faalapotopotoga lava ile atunuu.
O le vasega o tina talavou o galulue feaua’i iai, e le totogia, ma le faamoemoe e oo oo atu i nuu i tua lenei polokalame ile lumanai, ia maua se avanoa i nuu i tua.
Peita’i ile taimi nei, ua aoga tele le Face Book, e avatu ai talosaga a aiga mo fesoasoani. Ua tusa ole tolu tausaga talu ona feoa’i le Faith Angel Foundation e molimoli atu mealofa i aiga e fesoota’i atu. Talu le mana’omia o le auaunaga, pei ona saunoa Clara Ah Kuoi, ua amata ai ile vaiaso nei le latou polokalame fou lea o le Feed the Children, i faleaoga.
