E faatoa faalauiloa aloaia ai le tupe pepa 60 tala a Samoa, ile afiafi ananafi, e faamanatu aloaia ai le 60 tausaga saoloto o Samoa, ae ua faamaonia mai e le tamaitai Kovana o le Faletupe Tutotonu o Samoa, Afioga a Maiava Atalina le tele o tagata o loo mana’omia.
I le faatalanoaga ma le Leitio Polenisia a le afioga a Maiava ile po anapo, ile faletalimalo o le Taumeasina, ile uma ane ole sauniga faapitoa sa faalauiloa ai le tupe pepa, na ia faailoa mai ai, “e silia ile lua miliona tala na lolomi ai le tasi le miliona pieces (pepa).” Na ia saunoa ile alumia tele ole tupe pepa 60tala ile taimi lenei. Ae na amata ai lava anapo ona tatala le avanoa mo oka ole tupe pepa.
E $60miliona tala le aofai o tupe pepa tai $60tala lea ua avanoa ai nei mo le faatauina e tagata e faamanatu aloaia ai le tausaga lona 60 ole saolotoga o Samoa i ona tala faasolopito.
O le afioga ile Palemia, Fiame Naomi Mataafa na ia tatala aloaia le faamoemoe ma faafetaia le sao o tagata uma ae ole pulega o le faletupe tutotonu.
Na ia aloaia foi le sao o tamaitai e to’alua ua sainia ai ile tupe lenei mo le taimi muamua foi ua pipii ai ni saini a tamaitai ile tupe a Samoa, le afioga ile Minisita o Tupe, Mulipola Analosa Ale Molioo ma le Afioga a Maiava Atalina Ainuu.
Saunoa foi le afioga a Mulipola ile tumatila mai o lenei tupe pepa, i ona itu uma e faamanatu mai ai pea le 60 tausaga saoloto o Samoa, aemaise ai, ole ata ole tuaa ole afioga ile palemia, ia Fiame I lesi itu, lea ua fetauai lona tula’I mai ilenei vaitau ole 60, ae ole ata o lona tuaa I lesi itua o le tupe, Fiamē Mataʻafa Faumuina Mulinuʻu II ole ulua’i Palemia foi o Samoa ina ua tutoatasi Samoa ile 1962.
Ole sauniga na faia ile faletalimalo o le Taumeasina i Moataa ma faatumulia i faaululuga ole malo, ma valaaulia ae ole vasega o le aufaasalalau e molimauina lea foi laasaga o tala faasolopito o Samoa, ae o sasa e taualuga ai le tausaga atoa o faamanatu le 60 tausaga ole aso fanau ole tatou atunuu.
O lesi vaega ole taualuga, lea ua malaga atu ai le malo i Lealatele i Savaii, Samalaeulu, e faamanatu aloaia ai le silia I le selau tausaga talu ona taunuu le lotu Katoliko Roma i Samoa
