O le faainaelo (tulou) iai o tagata ile uati tele oi le taulotoaiga o le taulaga i Apia, le mafuaaga autu, ua ati ese ai togalaau matagofie na siomia ai, ae fau ai le pa u’amea tusa o le lima futu le maualuga, e puipuia mai ai le toe soona uia e tagatanuu ma tulisi.
O ananafi na vali ai ma faamae’ae’a nai vaega o totoe o le pa u’amea, ua soo atoa ai lava le faataamilosaga o le uati, ma ua faigata ai foi e le au faatama’i ona toe faatitipa ai tulou, pe afea e tagatanuu ma tulisi mo pu’e ga ata ma malologa.
O le uati tele lea e leai sana tupulaga o soifua mai pea ile tatou atunuu ile taimi nei, ua tusa ma le 103 ona tausaga, o le meaalofa a le aiga o Taisi Nelesoni mo Samoa, ma avea ai ose faailoilo e iloa gofie ai Samoa ile lalolagi, pei ona iai faailo ile tele o atunuu tetele e iloa gofie ai.
O suiga faasolo ia o foliga vaaia ole uati ile taulaga mai tausaga ua tuana’i. Sa tanumia atoa lona faavae I palapala. Ma osofaia ese taavale saosaoa na lavea ai ma faamanu’alia ai le avetavale.
Mulimuli ane sua uma ese palapala na tanu ai lona faavae sitepu sima, ae toe taatia mai ai ona ulua’I foliga pei ona sau ai. Ma toto faataamilo ai loa le toga laupama ma felila felanulanuai, viole ae tele ile pa’epa’e.
O laupama o le faatusa o le filemu ma le faaolataga, na fola ai e tagata Kerisiano le auala a’o afio atu Iesu i Ierusalema ma oo mai nei o loo faamanatu pea e Samoa, le Aso Sa o le laupama, a’o lumana’I le Aso Sa ole Aso Maliu, e alu ai solo a fanau Kerisiano ile falesa ma pepese , ae tofu ma le lala ole pama.
Peita’i ua faitau aso taunuu ile Aso Sa ole laupama, ae ua sua ese lena faamanatu o le filemu ile taulotoaiga ole faavae o Samoa I lona taulaga I Apia.
Ole Aso Sa ole laupama i talaaga o tagata Kerisiano I Ierusalema sa o latou fola ai le ala na savali ai Iesu,
Ole uati tele ile taulaga, o loo lisi ai suafa o tagata na maliliu le taua, ma avea o se tasi o aso faamanatuina I le kalena a le malo o Samoa,
Sauniga e manatua ai, le ANZAC Day. Aperila 25 o tausaga ta’itasi.
E le’i mamao atu ona taofi le faaaoga ole uati e fai ma tautaulaga fu’a a le aufai pisinisi ma faalapotopotoga tumaoti, e faailo ai a latou faatosina.
E le’i maua se tatou avanoa ile Matagaluega, o gafa ma galuega faapea, peita’I o loo ta’u e le Minisita o Pisinisi ma ala manuia, ile Samoa Observer ole aso, Leota Laki Sio, e $48afe tala le tau ole galuega e aofia ai ma le pa u’amea lea ua siomia ai nei le uati tele ile taulaga.
Ua sui ai nei le vaai, ose vaega o tapenaga ile taunuu mai o taitai o malo ole taupulega , CHOGM, aua lana fono muamua ile Pasefika, ua talimalo ai Samoa.
O le pa u’amea ua siomia ai le uati ile taulaga I Apia, pei ona molimauina ai nei, ose faiga ina ia malutia ai mai le soona faainaelo iai (tulou).
Ma saunoa ai le tina matua ia Lui Iupati, 94 tausaga o le soifua mai Falelauniu, “sa tatau ile Minisita ona fai ni polokalame e a’oa’o ai le tumama ma le tausia ole siosiomaga, ae tuu le togalaau (pama) ole filemu ‘aua le aveesea ma lalo ole uati.
“O foliga vaaia na o le faakerisianoina o Samoa, filemu, ae ole alofa o Iesu Keriso, aemaise ua toeititi lava oo atu ile Aso Sa ole Laupama ae ua toe ati ese lava, ae tuu iai le faamanatu o pulega faakolone, e faatua’oi ai tagata.”
