Mai le 51 itumalo ole tatou atunuu, e 10 itumalo o soifua ai tagata e silia ile 20afe o le ‘a le oo atu iai fesoasoani tutusa pei ona manuia ai le silia i le 180afe isi tagatanuu, o usitaia e o latou faipule tuutuuga o le poloketi miliona tala a le malo.
O na itumalo e 10 pei ona saunoa le taitaifono o le Poloketi miliona tala, ale malo, Susuga Laaulialemalietoa Polataivao Leuatea Schmidt , ose tulaga e faanoanoa ai tele, ona o le le mulimulita’ia o aiaiga ma tuutuuga ole poloketi.
“ O Aana lua, ua tuli ese le sui taitaifono a le Komiti, ia Lolomatauama. Ua matua tele ai le feteenaiga ma le upu faapea e na’o na avatu lava (o tupe ) tufa loa. O lona uiga e le mamā i le malo le mea lea. Ua uma ona avatu faiga faavae e faatonutonu ma aiaiga e faia ai. Ae o lea ua muamua aliali mai le mea lea, e le mafai ona faaauau. Ona finagalo ai lea o le komiti faafoe, e (faatafa) uma le 10 lea, sei Iloilo mulimuli ae faaalu pea le poloketi ia.
O ai lava itumalo e onosa’ia ma talitonuina ile mea e tatau ona iai, fai faasolo, avatu latou paketi ma faiga faavae, ma faasolo lesi vae, o le 150afe, mo le faauauina o totogi ole aufaigaluega, ae vaelua le vaega mulimuli ile tai 400 ma ona tupu afe, mo galuega faaauau o atinae a le itumalo.”
Ua mae’a faapa’ia ai le Ofisa tutotonu o le itumalo o Faleata 4, na faaaoga iai le latou vaega tupe muamua. O le ofisa na tatala i le Aso Toonai talu ai, 14 Ianuari 2023, ma auai atu iai le AFioga ile Minisita o Tupe, Mulipola Analosa Ale Molioo, ma le Taitaifono o le Komiti faafoe o le Poleketi, Minisita o Faatoaga ma Faigafaiva, Susuga Laaulialemalietoa.
Ma saunoa faafetai ai le Susuga a Ulu Vaomalo Ulukini ile malo, ae o le itumalo ma lo latou tofi.
Ma saunoa ai le faipule , Ale Vena Ale, ole fale ole itumalo, e tusa o le $120afe tala. Molimauina, ole fale fou lava, malosi atoatoa, fau i piliki atoa, lua potu ofisa e tofu ma laulau fou, nofoa fou, kapoti fou mo faila, e’a malulu, lua faleui , ma le potu fono ole afa o le fale, ua faatotogaina foi i laulau uumi ma nofoa fou. Na saunoa ai le faafeagaiga ole afioga o Toamua, Rev Doctor Eletise Suluvale, e faafetai ile atina’e ua molimauina mole nuu aemaise o le Itumalo.
E faato’a agavaa le itumalo lea o Faleata fa, i lesi vaega o le latou mliona tala, pe’a faaoo atu foi a latou lisiti, o le $120afe na faalu i le ofisa fou, ma totogi o le aufaigaluega, ma le lisi o fuafuaga alualu mamalo o atina’e fai mo le itumalo, pei foi ona faia e se vaega o itumalo ua faagasolo a latou atinae.
