E taunuu mai ai i fanua ile Aso Tofi 11 Aukuso, le ausii mamafa a Samoa lea na malaga atu i taaloga a Malo o le taupulega na faia i Birmingham Peretania.
I se faamatalaga mai le Ofisa o le Failautusi a le malo, o le’a taunuu faatasi mai ai ma le Peresetene ole SASNOC, ole pulega ole au Sii ma le au taaalo e aofia ai ma le to’afa lea na maua a latou pine mai le taaloga.
I faamaumauga, na’o le 12 pine na manumalo mai ai tagata taaalo atu i atunuu e lima a le Pasefika.
Peita’i na’o Samoa na manuia ile Pine Auro, a le alii sii ia Don Opeloge, ma pine siliva e tolu, na maua uma e le au sii.
O loo maua foi lesi pine siliva a Samoa i fusuaga, ae le’o mautinoa le taimi e malaga mai ai, Tupuola Ato Plodzizki-Faoagali ma lana Pine Siliva.
O Tupuola lesi tama fusu mo Samoa ua tapena atu mo le filiina o tama fusu mo taaloga Olimipeka ae o isi taaloga a le Pasefika.
