O loo soifua laulelei pea le Afioga i le Palemia, Fiame Naomi Mataafa, e le’o pisia i le siama Koviti.
Vagana ai ana leoleo faafeao e toatolu ua aafia i siama ole fama’i o loo pepesi, ma faamaonia mai e le pa’aga faamoemoeina mai totonu.
Peita’i na faamaonia mai foi e le sui Komesina o leoleo ma Falepuipui, Auapaau Logoitino Filipo, le pisia ole silia ile 300 isi foi leoleo ole Matagaluega. O na tagata ofisa na pisia i lana faamatalaga, silia i le 200 ua toe malolosi ma toe faaauau a latou galuega.
Na faamaonia mai foi e le taitaifono o le DAC Komiti o faalavelave tutupu faafuasei, ole Failautusi foi a le Kapeneta, Agfii Shem Leo, ile feiloaiga ma le aufaasalalau ile Aso Tofi ole vaiaso nei 14 Aperila, “o loo manuia le Afioga i le Palemia.”
Ma e le faamaonia tala sala tua o loo taape faapea ua aafia le Palemia i le siama koviti.
O ta’ua e le paaga mai totonu, “e toatolu leoleo a le afioga i le Palemia, ua aafia i le Koviti19, ae manuia lava lana afioga.”
Peita’i o saunoa Agafili, e le nanaina se faamatalaga pe ana faapea o aafia le Palemia i le faama’i, ma e le faailogaina e le siama se tagata e mafai lava ona aafia ai soo se tagata.
