Ua sao atu ai nei le siama o le koviti ile falepuipui Vaiaata Savaii, ma pisia ai le toa 20 alii o tuli faasalaga i Savaii.
I le tatou faatalanoaga ma le Sui Komesina ole Matagaluega o Leoleo ma Falepuipui, o gafa ma le vaaiga o Falepuipui e tolu i le atunuu, Leiataua Samuelu Afamasaga,
Na ia faamaonia mai ai aafiaga o pagota i le faama’i. “O le Aso Toonai na te’a nei faato’a pisia ai pagota i totonu o le faalepuipui i Vaiaata, mai le 64 o alii, 20 ua aafia.
“I le falepuipui i Tanumalala, mai le amataga, na oo lava i le 70 pagota na pisia e oo mai nei ua toe 18 i latou o alii o loo iai pea i le tulaga pipisi positive. E toafitu tamaitai na aafia ma toe manuia uma i Tanumalala.
“I le falepuipui i Olomanu sa mamai le tusa o le 20 ua toe manuia uma lava.
Ae o le pepesi o le faamai i Tanumalala na amata mai lava ile taimi o le taumafai a se vaega e sosola i tua, ma o atu ai leoleo i totonu , o masalomia o leoleo na na avatua le siama i le lotoa.
E to’alua tama matutua ole falepuipui na ave i tua ona o gasegase e mafuta ma o la aiga, ua faamauina le maliliu ai i tua, ona o gasegase tumau o loo aafia ai.
