O le aso 7 o Novema 2022, sa malaga atu ai sui o le Ofisa o le Failautusi o le Fono Aoao Faitulafono i Hobart Ausetalia, e auai i polokalame i le Palemene a Tasemania.
O le faigamalaga sa aofia ai le Sui Failautusi – Lesa Yonita Tuia, Failautusi Fesoasoani o le Vaega o Maota ma Taualumaga – Tofilau Valasi Iosefa, Failautusi Fesoasoani o le Vaega o Komiti Faa-Palemene – Lemalu Ruta Masinalupe ma le Faauluuluga o le Vaega o Sootaga ma le Atunuu Lautele – Erosi Koria.
Sa aofia i lenei polokalame le asia o vaega eseese o le Palemene o Tasemania, faapea ma le avanoa e molimauina ai taualumaga o le Maota Fono (Maota Maualalo) faapea le Fono Aoao (Maota Maualuga) ma Komiti Faa-Palemene. O le aoga o folasaga ma malaga faamasani a le Vaega Faale-Aoaoga a le Palemene, na mautinoa ai le taua o le faaauauina o fesootaiga manino i le va o Palemene ma tagata lautele o loo latou tautuaina.
O lenei polokalame o loo faatupeina e ala i le Pacific Parliamentary Partnership Funds, ma o loo atagia ai le tuuina atu atoatoa o le lagolago a Palemene a Ausetalia mo le uunaia ma le faamalosia o faiga faa-palemene i le pasefika.
O nei faiga faapaaga sa faatuina i le va o Ausetalia ma Palemene a le pasefika.
O le Palemene a Tasemania, o loo fai paaga ma le Palemene a Samoa. Sa amatalia aloaia lenei faiga paaga i le 2007 na faamaite e le Faalapotopotoga Faa-Palemene o Malo o le Taupulega, ina ia tapue ma faaauauina ai le atinaeina o galuega faa-Palemene.
Ua molimauina foi le faamanuiaina o le Ofisa o le Failautusi o le Fono Aoao Faitulafono a Samoa mai lenei faiga paaga i tausaga ua tuanai, e ala i polokalame faale-aoaoga faapea fetufaaiga faale-galuega a le aufaigaluega e faalauteleina ai le tomai faapea le faaleleia atili o le faatinoina o le auaunaga.
