E ui ile tele ma le mamao ua oo iai tapenapenaga a le Malo o Samoa, e ala lea ile fonotaga tele lea e faia ia Oketopa ole tausaga nei, ae oloo iai lava popolega ma tuu fesili le atunuu, poo lava se tapenaga ole Soifua Maloloina e tali atu ai i fa’ama’i lea oloo pepesi nei i atunuu mamao, aemaise lava o lea e auai mai foi i lenei fonotaga atunuu ia oloo maualuga le pasene o a latou tagata oloo aafia i lenei fa’ama’i ole Ebola ma le Monkey Box.
Ae ile faatalatalanoaga a le Sui faatonu sili ole Matagaluega ole Soifua Maloloina afioga Tagaloa Dr Robert Thomson e ala i se tasi o polokalame a le Matagaluega e faapea “ooe ma lou malo”, oloo faatalatalanoa ai tapenaga a le Matagaluega lea ua oo iai ile taimi nei.
O lenei fa’ama’i ole Monkey Box faapea ai ma le Ebola o fa’ama’i nei lea oloo aafia tele ai le atunuu o Aferika ae e matele lava i fanau laiti, lea e faitau afe ma afe tagata oloo aafia ma maliliu ai i lenei fa’ama’i ae o lea e faamauina e iai sui o lea malo oloo auai mai i lenei fonotaga ia Oketopa.
O lenei fa’ama’i na faailoa e le sui faatonu sili e tai tutusa ma le tagesusu ae pau le eseesega ma le Monkey Box e lapopo’a putaputa ole tino toe tiga vaega oloo manu’a ma ole vaega tonu foi lea ole popolega ole atunuu atonu e le omai nei tagata, ma aumai lenei fa’ama’i ma pepesi solo ai i totonu o Samoa.
