Ua faamanatu mai e le Matagaluega o le soifua maloloina matua uma o tamaiti I lalo o le lima tausaga le matutua , e faamautinoa ua fai o latou tui o le misela ma le mami ma le rubella poo le MMR.
Talu o lea na alia’e le tagata pisia I le misela i Niusila ma Ausetalia, ae o loo tatala pea femalagaiga ile va o na atunuu ma tatou , ma ose lamatiaga foi lena mo Samoa i se isi osofai mai a le misela.
O le tausaga e 2019 na pepesi ai le siama o le misela I le tatou atunuu na maliliu ai le toa 83 o Samoa, o le tele lava o fanau laiti.
O le pepa o faamatalaga mai le matagaluega o le Soifua maloloina, o ta’ua ai, e ui o loo faaauau pea le faiga o tui puipui, ae e iai lava tamaiti I lalo o le lima tausaga e le’i faia tui puipui ile taimi ua faatulaga ai, aemaise ai le MMR, pei o Apia ma vaega I matu sisifo.
Ae o le faama’i o le covid19 na pepesi ile lalolagi atoa, na ala ai ona aafia foi le taimi ma le aofai o fanau e fai tui puipui mo faamai tamaiti, e aofia ia ma le misela. Ma ua taunuu ai le toe osofai mai o lena faama’i i le tele o vaega o le lalolagi.
Ua fautuaina malosi ai lava e le Matagaluega, Matua e avane lou alo ise falemai lata ai, ise taimi vave e fai le tui puipui o le mami ma le rubella MMR, e mana’omia le 2 doses o le MMR vaccine, e ao ona puipuia ma fai le tui I le iva masina ma le 15 masina.
O le misela e maualuga lava lona pipisi, o le siama e nofo ile isu ma faua mai le faaii tulou o le tagata ua pisia, ma e mafai ona pipisi atu i isi pe’a tale ma mafatua.
A manava e lesi tagata le ea o loo siama pe papai foi ise mea o loo iai le siama ma toe lote mata ma le isu poo le gutu, e mafai ona tele le avanoa e aafia ai lena tagata I le misela, pe’a fai foi e le’i fai se tui puipui ma oge vaitamini lou tino, ole fai lava o le tui puipui o le MMR e laititi ai le avanoa ete misela ai pe mami poo le rubella.
Tala mai le soifua maloloina o auga o le misela, e iai le fiva, tale matutu, mumu ma fulafula mata, laumata ma vaia mata, le fia pupula I le malamalama, tafe le isu, mafatua, pata eena le tino mai le ulu ma soloatoa ia le tino, faaleleva ma tiga le tino ma le fia ‘ai.
Ia vaai loa se fomai ise taimi vave lava, pe’a fai ua iai se isi o le tou aiga ua maua I na aafiaga.
O aafiaga o le misela e aofia ai le afaina o le falogo o taliga, e mafai ona leaga ai lava ma le faalogo, tafi o le manava, fulafula ile faiai ma agai ai ina faletonu le mafaufau ona o le misela.
Ua fautua malosi mai ai le Matagaluega o le Soifua maloloina I matua e faamautinoa ua fai tui puipui o fanau, ma tui o le misela ae o tui puipui o si faamai tamaiti.
