Galulue lava e faia le sailiga tupe ma fesoasoani i mataupu tau sauaga o loo faaulu atu ile taimi e tasi.
O loo faagasolo lava le faalauiloa a le Toomaga e leo misi lava foi se aso ma se sui o faalapotopotoga poo se afioaga e afea le Toomaga ma tauaao se maau e faailoa ai le agaga fesoasoani.
Peitai e leo misi ai foi ma se case poo se matupu tau sauaga o loo faatoai atu ma sulu atu ile Toomaga mo se laveaiga mai sauaga
Saunoa le tina poo le Peresiteine o le Toomaga mo e puapuagatia le susuga ia Siliniu Lina Chang e ui i se naunau e faamuta nei tu ma aga le alofa ae paga lea e leai se malosiaga e mafai ai ona tetee atu ai i sauaga o loo aliae mai pea i totonu o Nuu ma aiga.
O le aso ananafi molimau ai Siliniu i le pisi o le aufaigaluega ile faagasolo lea o le sailigatupe o loo faasolo nei ae faateia ile sulu atu foi o se tina maitaga ma lana tama mo se fesoasoani mai le Toomaga
Peitai saunoa Lina e leo mafai ona vaoia pe taofia ai le lima laveai ma le lima fesoasoani a le Toomaga i le latou galuega tauave o le aapa atu ma faaola i se o mafatia mai sauaga
Ae o le faafetai maualuga ile Atua i lona alofa ua totofi ai i latou e gafa ma lea foi valaauina ae faafetaia ai foi le mamalu o le atunuu atoa ua tuu atu le aao fesoasoani e ala ile sailiga tupe a le Toomaga
E le silia male 100 alo ma fanau ae o tina o loo faamautu i lea nofoaga ma o loo tatala pea le avanoa e foai ai se seleni ua e gafatia e fai ma ou sao i lea foi apitaga.
