Ua sauni alii ma faipule o le afioaga o Levi ma Alamutu Saleimoa e faaulu le tagi e faasaga ile faipule o le itumalo o Sagaga 2, le afioaga ia Maulolo Tavitia, i lona tuuina atu lea o le tino i tupe e $2,000 i malu o le malo, na faatinoiina le galuega o le puipuia o le filemu i le Aso muamua na tulai mai le feseeseaiga i le va o afioaga e lua.
O le latou mau ua faia e Maulolo lea tulaga ina ia faatosina ai malu o le malo e tutu malosi e puipuia lo latou itu.
Na maua le avanoa o tusitala o soo se ala faasalalau e auai ai i le fono a le afiaoga o Saleimoa i le Aso Gafua o le amataga o le vaiaso nei, na tatou auai atu iai ma maitauina.
Ua tasi le afioaga nei o le a saili le pule o fanua o loo finau mai ai Afega, ma le latou mau, o eleele lava o Levi.”
O le mau a Levi Saleimoa o loo ua tuuina mai i le saunoaga faalauiloa a le afioga ia Umu Pati Muaau, sa iai se suega tuaoi na faia i le tausaga 1911.
Peitai “E le mafai ona suia ai le latou mau, e lē o iai se feagaiga na faia ma Fata ma Maulolo.. ae o le 1911, na faatulaga ai loa tuaoi, ma e fa lava tulimanu poo corners o lena tuaoi e aofia ai Lotonoa, Alia, Laumasa ma Levi.
Saunoa Umu, na faasalalauina i le 1911 nei tuaoi i le Savali, ae lei iai le afioaga o Afega ona ua maea ona tuuina atu le fanua ia Levi.
“O le eleele lea o Laumasa, e 54 eka. O Laumasa na aafia i le 723 eka a Fata ma Maulolo. Ona totogi mai lea e Fata ma Maulolo o ia eleele agai i Alii ma Faipule o Levi, ma o loo iai lava faamaumauga o a latou finauga.”
O eleele o loo tulai mai ai finauga i afioaga e lua ua ma’ea ona taoto ai faaiuga a le Faamasinoga o Fanua ma Suafa e tusa ai ma se faamalamalamaga na tuuina mai e le Peresitene o Fanua ma Suafa e tauala mai i le Ofisa Sili o le Matagaluega poo le Resitara o Faamasinoga le afioga iā Papalii John Afele Taimalelagi.
O faamaumauga a le Faamasinoga o Fanua ma Suafa, o le 1963 o loo māua ai na teena ai se talosaga apili a le afioaga o Tuanai. E lei iai se talosaga poo se itu a le afioaga o Levi i le faamasinoga lena o le 1963.
E ui ina taoto faaiuga a le Faamasinoga o Fanua ma Suafa o eleele e pulea e Fata ma Maulolo, peitai, o loo maualuga pea le taofi ia Umu ma le afioaga o Levi, o eleele o loo finau ai nei, o eleele mai tofiga a Malietoa i lana fanau o le faleono Leatigaga.
Peitai e ui ai la i le teena e le ofisa autu o leoleo i Apia o le talosaga a alii ma faipule o Levi ma Alamutu Saleimoa e faasaga i le faipule o Sagaga 2, ae leo iai toilalo ai e finau ina le mea moni pei ona saunoa iai alii ma faipule o Saleimoa.
