O le faaaoga ai e lesi tamaitai o faamaumauga o lesi tamaitai Samoa e faatino ai gaioiga faasolitulafono e le’o se mataupu fou.
Na molimauina mai i tausaga ua tuanai, i Niusila, se tamaitai Samoa na ia faaaoga faamaumauga o lana uo teine e fai ai lana nonoga tupe, ae mulimuli ane lava maua .
Peitai o le mataupu lea ua maona mai nei ma faamaonia mai e le pulega o le Matagaluega ole ofisa o Leoleo ma Falepuipui i Samoa, ole tagi po’o faasea ase tamaitai Samoa i Niusila, Helen Sagaga, ua faaaoga e se tasi o mafine e nofo i Samoa nei, ona faamaumauga.
E aofia ai ma lona ata e gaoi ai mai isi tagata, ma ua tele tagata ua molimauina e Sagaga le afaina ile tagata lea o loo ia faaaoga ona faamaumauga i luga o fesootaiga televavave, Social Media.
Ua faia iai suesuega ale matagaluega a leoleo i Samoa nei, pei ona faailoa mai e le ofisa o leoleo, ina ua tatou fesiligia. Peita’i na talanoa Ms Sagaga i le Leitio Polensia, na ave lana mataupu ile ofisa o leoleo i Niusila, ae fautuaina ia, e sili le tapa mai ose fesoasoani i leoleo a Samoa.
Ma faapena ai lava ona faasee mai i Samoa, o ta’ua ai ua silia i le lua tausaga talu ona faaaoga lona igoa ma ona faamaumauga e le mafine o tuuaia e maua ai ana mea i auala faasolitulafono.
O loo ia fia iloa foi pe o iai nisi mataupu o iai ni faamaumauga faapea i Samoa.
Ma o loo ua suesu’ea ai nei lea mataupu e le ofisa ole Matagaleuga o Leoleo ma Falepuipui i Apia.
