O loo fa’asolo lava sailigia a leoleo ma tupulaga uma o le afioaga o Pu’apu’a i Savaii i le susuga ia Olo Tautulei na alu e fagota i le po anapo ae maua e le afioaga e le’i toe foi ane i uta.
Ta’ua e le susuga ia Wesley Valaau o se taulealea mai le afioaga o Pu’apu’a i le Leitio Polenisia o Olo na alu e fagota i e po anapo.
Peitai e malama mai lava le taeao o le aso e lei toe foi ane lava i uta.
Na faafesootai le Matagaluega o leoleo mo se fesoasoani, na taunuu atu loa alii malu o le malo e silia ma le toa 5 ma amata loa le sailiga e aofia ai ma tupulaga talavou uma o le afioaga.
Taua e Wesley na foi mai uta le sailiga i le tea o le itula e e tasi ma e lei manuia ma fai sina faamalosi tino ma a maea ona toe agai lea o le sailiga.
O le susuga ia Olo ua fai lona toalua ma ua fai foi lana fanau ma fanau a lana fanau, Molimau le taulealea na valaau mai e na o Olo lava na alu lona faiva anapo e leai nisi au fai faiva na latou o, ma faatoa tupu foi lea o lenei ituaiga faalavelave i le afioaga.
