6 Ianuari, 2025. Samoa: O loo taofia pea i lalo o le vaaiga a leoleo le alii talavou ile falemaliu o le Tupua Tamasese Meaole i Motootua, e talia ai sona aiga.
E le’i manuia le taumafai atu ile telefoni a le Komesina a le Matagaluega, o leoleo mo se faamatalaga, peitai o ta’ua e le tatou paaga e iai lona sootaga va lalata ile Matagaluega o leoleo,
O le tino maliu lea na maua atu e leoleo ile vaveao o le Aso Tofi 2 o Ianuari, ua pule esea le soifua.
O lona tino na maua i Mulinuu i talane pulu tetele o loo iai i lena vaiaai lata i ofisa o le malo oi lata ile taligalu.
Mai le tatou paaga e iai le sootaga ile matagaluega o leoleo, o le atalii lea pe ile va o le 30-40 tausaga le matua, e iai pe’a i lona fatafata, ma vaega o lona tino, e iai foi ma pe’a e faaupu poo ni faaupuga o loo tata i le tino.
E le’o iai se faasalalauga ile sailiga o lea atalii i luga o le itulau a le matagaluega o leoleo, peita’i o loo taofia pea lona tino maliu, ile falemaliu ole TTM e talia ai se aiga o misi se latou tagata.
O le maliu lilo o lea atalii, o taua e le tatou paaga e leo atagia ni foliga faapea na faaoolima iai se isi tagata, pe na fasi e nisi.
O masalomia o ia lava na faatupuina lona maliu, peita’i e le’o tuua ai tiute masani a leoleo i ituaiga o faaletonu faapea.
O lesi maliu ole tausaga fou, o le alii talavou e masalomia na so’a ele taavale i Faasaleleaga Savaii ma maliu ai.
O lipotia e le tatou paaga e iai le avetaavale ua taofia ma molia ile avetaavale faatamala ua afua ai le maliu.
