Ua tusa ai nei o le vaiaso talu ona saini e Samoa le la Maliega ma le UAE, ole faapuupuu lena ole igoa o lea foi atunuu: United Arab Emirates.
Ole United Arab Emirates poo le UAE ole atunuu lea ei le Konitineta o Asia e fausia mai tama’i setete e fitu, e aofia ai Dubai, Abu Dhabi ma isi setete e lima.
Peitai o le aso 1 o Oketopa na sainia ai e le afioga i le Minisita o Galuega , Olo Afoa Fiti Vaai, mo le malo o Samoa, le maliega ole ASA poo le Air Service Agreement, e faataga ai ona feoa’i mai vaalele ile va o ia malo.
Ma na faia lea sainigalima i le aai o Quebec i Montreal i Canada, ma le faatonu aoao o le pulega o Vaalele sivili a U.A.E. Saif Mohammed Al Suwaidi.
O le taua o lea maliega ile va o atunuu e lua, aua o le a faaleleia atili ai le fesootaiga ile ea, ma faapena foi ona lele mai vaalele na i Samoa.
Na faamauina foi e le afioga ile Minisita , pei ona ta’ua i le faamatalaga falauatele: i le leai ai ose vaalele lapoa a Samoa, ole maliega lea ua faataga ai Polynesian Airlines Limited, ua iloa ai nei o le Samoa Airways ona maua le avanoa e Code Share ai ma soo se Vaalele mai le U.A.E.
O le maliega lea , ua tatala ai foi avanoa mo Code Sharing a le U.A.E ma latou sootaga faavaomalo ma isi kamupani vaalele.
O le aumalaga lea na taitai e le Afioga Olo i Kanata, mo le fono lona 41 a faalapotopotoga faalevaomalo o mea tau Vaalele ma malae vaalele.
E aofia ai le M.W.T.I. Chief Executive Officer (C.E.O.), Fui Tupai Mau Simanu, Samoa Airport Authority (S.A.A.) General Manager, Silimanai Ueta Solomona, M.W.T.I. Civil Aviation Division Assistant C.E.O., Lauano Yvonne Tuioti-Mariner, M.W.T.I. Legal Assistant C.E.O., Kalameli Seuseu, and S.A.A. Assistant General Manager Aeronautical Services, Toilolo Tyronemoore Lam.
E faia nei sainigalima mo se auala e faafaigofie ma taugofie ai feoaiga i le ea mo Samoa, ae o le vaiaso nei lea na folafola ai e le taitai o le itu agai, Tuilaepa Sailele Malielegaoi i lana fono ma tusitala, pe’afai ae toe foi mai i totonu lana vaega faaupufai, HRPP, o le a aumai loa vaalele e le tasi ae lua.
