O le taeao o le Aso Faraile, 27 o Me 2022, i le 10 i le taeao, i le Maota o le Tooa Salamasina, na faatinoina ai le sauniga e tatala aloaia ai le Sainiga Aao mo le Maliega Tautupe (Funding Agreement), i le va o le Malo ma Itumalo, mo le faamatuuina atu lea o le tinoitupe e $200,000.00, i Komiti Faaitumalo e sefulu ma le valu (18).
Na saunoa le Afioga i le Minisita o Tupe, Hon. Mulipola Anarosa Ale Molioo, e tatala aloaia lea faamoemoe taua, ma ia faailoa ai, o le tapenaina o le Poloketi lenei o le Atinae mo Itumalo sa lei faigofie ona fuafua mai aemaise o le tulaga e tatau ai ona faamalieina faiga faavae a le Malo, aemaise ia faafaigofie le faatinoina o atinae a itumalo faapalota e 51.
O le Sini Autu, o lenei poloketi ia faaleleia le atinaega o le soifuaga lautele mo le manuia o tatou tagata, ma e amata mai lea i le atinaeina o itumalo e faaaogaina ai lava o latou aao, taimi, malosi, tomai poo le agavaa ae le gata i lea, o le faaaogaina o le oa faalenatura ma le siosiomaga e pei o laufanua, vaitafe ma le sami ua foai e le Atua i lea itumalo ma lea itumalo.
O le faamoemoe o le Malo, e pei ona maioio i lana Taitala mo le Lumanai Manuia o Samoa:
1. Ia faaitiitia le mativa ma le le tagolima
2. Ia faaleleia le soifua maloloina mo le lautele
3. Ia lelei aoaoga
4. Ia faaaupegaina tagata i avanoa mo le soifua maloloina
5. Ia unaia atinae i totonu o nuu ma afioaga e pei o faatoaga, faiga faiva ma faasao, atinae o tagata tafafao mai fafo faapea atinae o pisinisi laiti.
Na ia ta’ua foi, o se faiga fou lenei faiga, o le faamatuu sao atu e le Malo o le fesoasoani tau tupe ma le Maliega e faatino e itumalo atinae e pei ona malilie ai, ma o le asō, o le a sainia ai le Maliega i le va o le itumalo ma le Malo o Samoa, mo le faamatuuina atu ai e le Malo le $200,000, mo itumalo taitasi poo le aofaiga e $10.2miliona Tala mo itumalo e 51.
O lenei fesoasoani, o le Vaega 1 lea o le poloketi lenei.
E 18 itumalo ua mae’a ona latou tuuina mai vaega manaomia i le Matagaluega o Tina ma Tamaitai, ma o le a sainia a latou maliega i le asō, mo le faamatuuina atu o le $200,000.00. Na ia faailoa foi, e ese le maliega e toe sainia foi mo le $1miliona Tala, pe a oo atu i le taimi e faamatuu atu ai foi le Vaega 2 o le tatou fesoasoani mo itumalo.
Na ia faamanatu mo le silafia e sui auai, o lenei maliega e sainia i le asō, e mo le $200,000.
O le a tuuina atu le faatuatuaga a le Malo i Komiti o Itumalo taitasi, ina ia latou tausisia aiaiga o lenei maliega. Ua faafaigofieina e le Malo vaega uma, mo le faamatuuina atu o lenei $200,000, ina ia mafai loa ona faatino le faatuina o le Komiti Faaitumalo poo District Councils, ma le Ofisa Tutotonu o le Itumalo faatasi ai ma le faafaigaluegaina o tagata faigaluega tumau i nei Ofisa mo le faagaioiina o le poloketi ma atinae a itumalo taitasi.
E iai le talitonuga, o lenei faiga o le a mafai ona faigofie le fesootai atu o le Malo i itumalo taitasi e uiga i le poloketi, o le $1miliona Tala mo Atinae o Itumalo aemaise atinae ma polokalame o le a faatinoina e le Malo i totonu o itumalo taitasi i le lumanai.
Na saunoa foi le Afioga i le Minisita, o le faamoemoe o le Malo, e tatau ona tuuina mai le ripoti ma faamaumauga o le faaaogaina o le $200,000.00, ae lei ma’ea le aso 31 Iulai 2022, e komiti ma itumalo taitasi. O le a amata foi talanoaga ma itumalo taitasi i le faaaogaina o le $1miliona Tala a le itumalo pe a mae’a ona faatino aiaiga o le $200,000, e aofia ai ma le asiasia e le Malo ma ua faamalieina tulaga uma. O le fua foi lea o le faamatuuina atu o le $1miliona Tala.
E talosagaina foi tatou itumalo, ina ia amata faatalanoaina ma le Matagaluega o Tina ma Tamaitai la outou Fuafuaga poo le Taiala mo Atinae o Itumalo. O le a faatuina se vaega faapitoa latou te mataituina lenei poloketi e galulue soosoo tauau ma le aufaigaluega a le Malo, ina ia maua pea e tatou itumalo le fesootaiga vava lalata aemaise le mataituina o le faaitnoga o le atinae, e finagalo ai le itumalo ma faamaonia e le Malo, o se atinae e manuia ai le itumalo atoa.
Na ta’ua foi e le Afioga i le Minisita, e iai le naunautaiga a le Malo, o lenei faiga fou o le avanoa faaauro lenei ua maua e tatou itumalo, e atinae ai e le gata mo le manuia i le taimi lenei, ae faapea foi i le lumanai. O le tatalo a le Malo, ia ave iai le faamuamua aemaise le fai mea lelei a Komiti Faaitumalo, ina ia ola le fatu ma faatupulaia, aua le manuia o tatou aiga, nuu ma le atunuu.
E valuvalusia aa o le laau, ina ia lagolagoina lenei faamoemoe e o tatou itumalo uma o le a faamanuiaina. Ia sosoo lelei le faatinoga ma ia o gatasi ma alafua ua faataoto i le tatou Maliega.
Faamanuia mai le Atua i le amataina o le Poloketi o Atinae mo Itumalo, ia avea lenei atinae ma auala e ui mai ai ana faamanuiaga ia Samoa ma ona tagata.
