Sao o afioaga i le taua tetee i sauaga

SHARE NOW

“E mafua mai i totonu o aiga, e amata atu foi i totonu o aiga, ona toto ai le fatu i loto o alo ma fanau ma e ola a’e foi e savavali ai”.

Ole mau tau’ave lena a le afioga a Loli Eperu, o le afioaga o Vaipu’a Savaii. O le manulauti foi lea o le polokalame, ia avea lenei feau ma se faamanatu ae o se lesona ia malamalama le afioaga i aafiaga o sauaga.

Na afea ai e le Toomaga mo e Puapuagatia le afioaga o Vaipu’a i le polokalame faaauau o loo lagolagoina malosi ma faatupeina e le Malo ‘E le saua Tamalii’.

O le aotelega o lea feiloaga e pei ona masani ai, o le faataunuuina lea o se aoaoga faatatau i le taua o le ola ma soifua i se siosiomaga saogalemu, ae amata i le taofia o sauaga faasaga i tina ma tamaitai.

O finagalo faalia o lea feiloaiga sa manino ai nisi o faafitauli o loo feagai ai ma le afioaga.

I le ma’ea ai o felafolafoaiga o finagalo i lea aso, na tasi ai Alii ma Faipule i se manatu autu mo le latou taiala e faapea, “A paia le pa i fualaga ona sua lea o le tuli e mapu ai tina ma tamaitai”.

Na faailoa foi le latou agaga faafetai mo le faamoemoega o le polokalame ia maua le ‘ola fiafia’ i aiga faapea le afioaga.