O loo faaauau pea ona ave iai lana faataua, pei ona molimauina ile vaiaso nei, ile tina 37 tausaga ia Tausala Misiotele. E to’a fa ona alo lea ua avea ma tagata faigaluega mo lona ia lava aiga.
Ua oo atu ile maketi a le Nofotane ana oloa e faatau faatasi ai ma oloa a le silia ile 100 isi foi Nofotane.
Na faamatala ai e le tina ia Tausala lona faamanuiaga i ana oloa taulima lalaga uma lava e ia, 100 pasene o oloa. Ua fia tausaga e leai sana galuega, ae sa alu i polokalame a le SVSG, Livelihood Skill tranining, poo aoaoga na faia e le Toomaga mo silafia tumau faapisinisi.
Ua maua si ona iloa amata loa ona fai ana oloa taulima, ma ua maua foi tupe. Ua siitia lona tomai ile agavaa ma felanulanua’i ai foi ma ana oloa, ua faaaoga iai foam materials, poo momoi mea, e gaosi ai fugalaau, oloa elei, tautaliga e gaosi mai fagu plastic ma isi mau oloa ua ia faatauina.
Ole faa’oaina lea o Tausala ma lona ma’elega , ua faatosina atu ai foi ma lona to’alua e fesoasoani ma ua avea ai nei ose pisinisi fai to’alua ma lona to’alua. Ole tala a Tausala, o le tasi lea faamanuiaga ua maua e le tele o tina Nofotane ile atunuu, na latou talitonuina le polokalame “Faa’oa le Nofotane’ a le SVSG.
O le galuega lea na tua iai lona aiga ile taimi o le Covid, ma ua amata ona tapena le toe faateleina ole maota o Tausala, ia lava se avanoa mo le pisinisi ina ua amata ona siita’i oka e mana’omia ai ana oloa. O le polokalame Nofotane, o lesi lea auala a le Toomaga ile taofia o sauaga i tina ma fanau i totonu o aiga.
E le gata ia amanaia ai le Nofotane e le aiga, aua o lea ua mafai ona ia tausia lona ia lava aiga, ae ia amanaia ai foi lona leo i mea fai. Peita’i e le mafai ona faatupe ma faagaioi uma nei galuega ale Toomaga SVSG, pe ana leai le polokalame ale UN Women Fund for Gender Equality, 2016-2018. Ma le European Union for the Sustainable Income Generation & Self
Employment of Nofotane Women Project (2020-2022). I le fitu tausaga talu ai pei ona saunoa Siliniu Lina Chang, Peresetene o le Toomaga, ua tele se suiga o Nofotane mai le vaaiga faaleagaifanua sa masani mai ai, ile avea ai nei ole Nofotane ose Upu ua tosina mai ai maketi i fafo. Ma e faaauau ai pea le sao ole SVSG, e faa’oa Nofotane i itu tau ile tamaoaiga, ma faaauau foi ana aoaoga ia faatumau ai pea le siitia ole Nofotane, ile talitonuga o Siliniu.
