5 Fepuari, 2025 Samoa – E leai se foliga faaititia o galuega tetee atu i sauaga faasaga i fanau i Samoa.
Talu o loo molimauina e le laina vili fua a le Toomaga le si’itia o le faitau o mataupu tau sauaga, faamauina mai e le 800-7874.
O le telefoni lea e ola 24 itula i aso uma lava, ae toetoe ina le misi lava se aso ma le vala’au, fesoasoani e taunuu.
Aemaise o le taimi o aso malolo, ole tele o vala’au o fanau sauaina e matua ma auaiga.
E iai le mataupu o le aso 27 o Ianuari, 2025, ole tamaititi sa faaauau lava ona sauaina e ona matua, ma auaiga, ae na’o le fa tausaga le matua o le tamaititi.
O lesi mataupu ole tamaititi foi e fa tausaga na sauaina e lona tauaiga, i le pa’u ma uno’oa ai ona foliga.
Na vave ona tali atu iai le Toomaga ma avatu i le falemai e togafiti, ma iloa ane ai le tele o manuaga tuai o loo i tino o ia fanau, e atagia ua o se sauaga faaauau.
E le fou foi le ituaiga o mataupu na aafia ai le teine 14 tausaga, o loo i totonu nei foi o le Toomaga, ma lona maitaga afua mai ile sauaga o feusuaiga faamalosi i totonu o lona ia lava aiga.
Ma ua faia iai suesuega a leoleo ile taimi nei.
O fanau sauaina fou nei, ua faaopopo atu ile silia ile 50 o isi fanau sauaina faapea, o loo taofia ma tausia ai ile lotoa o le Campus of Hope.
E faatali ai le faaauauina o suesuega o solitulafono poo sauaga na aafia ai o latou tino ma mafaufau.
I totonu o le lotoa, o taofia ma tausi ai fanau nei, ua iai foi ona aiaiga e lima ta’ita’ina a le galuega faatino i auala talafeagai ai.
Ina ia lagolago ma faamalosi ‘au i isi laasaga i lumana’I mo latou.
O saunoa ai le Peresetene o le Samoa Victim Support Group, SVSG Siliniu Lina Chang, mo aiga ma faalapotopotoga i Samoa, e galulue faatasi ia faamuta le sauaina o fanau. Ua oo mai le taimi e faamuamua ai fanau.”
Ma faafetaia ai kamupani telefoni, Vodafone ma le Digicel ile laina lavea’i vilifua o fesoasoani i galuega tete’e i sauaga, faasaga i fanau.
