Ua tapena ma olioli foi sui tamaitai o atunuu ma motu o le Pasefika aua le sailiga o se lalelei o le Pasefika 2024, e pei ona faatulaga mai i le aso 24 o le masina lenei agai le aso 4 o le masina fou.
Ae o se fiafiaga tele foi lea mo tagata o le motu o Nauru aua o se taimi muamua lenei o lea talimalo ai i lea foi faamoemoe taua e pei ona talimalo ai foi lo tatou atunuu i le tausaga ua mavae.
O tauvaga nei e pei o le sailiga o se lalelei poo se tausala o le Pasefika sa tele ina pale ma faamanuiaina ai tausala o Samoa i tausaga ua mavae, e pei o le tamaitai ia Fonoifafo, Verona ma nisi o tamaitai Samoa.
Ese mai i le tasi o tauvaga tele o le sailiga o se lalelei o le Kelope o loo auai atu iai le tamaitai ia Haylanni Pearl Kurrupu e fai ma ave fu’a o Samoa, o ia lea sa faapaleina e avea ma tausala o Samoa i le tausaga ua mavae.
Ae o le tausala o Samoa 2023-2024 le tamaitai ia Moemoana Schwenke o lea fai ma ave fu’a o Samoa i le sailiga o se tausala o le Pasefika, amata atu i le aso 24 o le masina lenei i Nauru.
