Toe tolu aso ona aulia lea o le faamoemoe tele a le Toomaga mo e Puapuagatia, o le Sulu lea o filemu e faasoo i Samoa atoa.
O le aso 30 poo le faaiuga o le masina lenei le Aso Gafua i le itula e 5 i le vaveao, ua faamautu mai e tatala aloaia ai le polokalame i luma o le ofisa autu a le Toomaga i Apia.
O le sauniga lotu e faia lea e le susuga i le faafeagaia o le Ekalesia EFKS Apia ia Latu Latai, ona sosoo lea ma le lauga faapitoa mai paaga o loo lagolagoina malosi le faamoemoe.
Ma faaola faapitoa ai loa le sulu o le filemu ma amata ai loa le solo tele o paaga uma o le Toomaga o sui mai afioaga ma soo se tasi o lea lagolagoina le faamoemoe i le taeao lava lea.
O le susuga i le faafeagaia o ia lea o lea tamoe muamua ma le sulu, ona sosoo lea ma le tamaitai Minisita o le Matagaluega o tina ma tamaitai le afioga ia Mulipola Anaroa Ale Molioo.
Faasolo atu lea i Peresitene o ofisa a le UNDP, o ofisa sili e pei o le Ofisa sili o le Matagaluega o Aoga, Matagaluega o le Soifua Maloloina, ma nisi o le mamalu o le malo.
E aofia ai ma le Komesina o leoleo o lea mafai ona latou faaauaua le faatamoeina o le sulu seia taunuu i Lalomauga le nuu muamua o lea moe ai le sulu mo le po muamua.
I le fonotaga a le Peresitene o le Toomaga le afioga ia Siliniu Lina Chang, e le na o sui o le Toomaga mai latou o loo sauaina e manaomia i lea aso faapitoa.
O Samoa atoa o lea tutulai faatasi ma sisi ae le tagavai o le loto gatasi e taofia ma faamuta loa sauaga i totonu o soo se nuu ma afioaga i Samoa.
