Saunoaga Afioga Sui Palemia i toe sauniga o Tapunuu Niko Lee Hang

O le a e’etai pea ia i mauga o ao ma le atufolasa pāia sauo’o ma mamalu o lenei Sauniga. Susū lau susuga i le Ta’ita’i o le Sauniga, Rev. Inu Amosa, fa’apea le pāia o Ositaulaga ua o tatou poto i lenei taeao;

Afio lau afioga i le Ao Mamalu o le Mālō ma lau Masiofo;

Afio le Sui o le Fono a Sui Tofia;

Afifio Minisitā o le Kapeneta ma Minisitā Lagolago;

Afio lau afioga i le Fa’amasino Sili ma le Vasega o Fa’amasinoga;

Afio lau afioga i le Fofoga Fetalai ma Sui Mamalu o le Fono Aoao Faitulafono;

Afio lau afioga i le sa avea ma Palemia o Samoa, Hon. Tuila’epa Dr. Sa’ilele Malielegaoi

Afifio le pāia o ‘āiga, paolo ma gafa na sausau sema, uō ma e masani;

Aemaise le susū mai o le Faletua ia Doris ma le nofoāalo.

O ituaso fa’apenei, na agi fa’asulu ai le tala na momoli mai, ma tutulu ai le Toa ma fa’apea ane mauga o Kilepoa e, ‘aua ne’i toe i ai se ua, pe toe totō ifo se sau ia te oe. Ae tautino le solo a le Tupu fa’amasino tonu, ‘e sili le aso e oti ai, nai lo le aso na fanau ai’. Auā o i latou uma e momoe o iā Iesu Keriso, e ui ina oti, ae soifua pea.

Ua mumutu vanu ma ala o le la. Talofa ua ifo le toega o le malama i Sinave ma Uluomoto’otua. Ua to ai le timu, tafea le tauofe, ua paū le masina, ma gasetoto le la. Ua lāgia ai le afio’aga o Usoali’i ma lāua Matua, ae usu le fono iā Atoamafuāupolu, le Faletolu ma le Vainalepa. O le lagi lea, auā le Tapaaufa’asisina, Susū Papāli’i ma To’oā, ma le fa’autaga iā Mago ma Luasiufanua. A ua pogisā Ti’afau, o le Malae o le fa’autugātagi a Samoa; auā ua tu’ua le Mālō e le afioga i le Sui Mamalu o le Fono Aoao Faitulafono o le Mālō Tuto’atasi o Samoa – le Fetalaiga iā Tapunu’u Papāli’itele Niko Lee Hang.

E lasi lā’au o le vao, ae iloga lā’au anagatā, e manomano fo’i fetu o le lagi, ae iloga fetu ta’iala ma fetu fa’atonu folau. O le ala lea o le tula’i atu i lenei taeao, e fai ai ma fofoga’aga o le afioga i le Palemia, Fiame Naomi Mataafa, ou te fa’aleoina le molimau a le tatou Mālō i le soifua auauna o le afioga i le Faipule o le Itumālō Palota o Vaimauga #3.

O fa’amaumauga o le soifuaga galue o le afioga iā Tapunu’u i lo tatou Mālō, sa mua’i avea ma Tausitusi (Accountant) i le Fa’alapotopotoga o Inisiua a le Mālō se’ia o’o atu i le 1990; ona tofia lea e avea ma Pule Lagolago i le Vaega e Fa’afoeina Tupe (Financial Controller) mai i le 1990 – 1997. O le 1997 se’ia o’o atu i le 2000 na tofia ai Tapunu’u e avea ma Public Trustee po’o le Tausi Mavaega a Samoa mo le Ofisa o Tausi Mavaega. O Tapunu’u, o se tamāli’i a’oa’oina lelei ma sa ia umia fa’ailoga mauāluluga mai i le Iunivesite o Waikato i Niu Sila, ma le Iunivesite a New England i Ausetalia.

Na ulufale Tapunu’u i le Palemene i le Paeā’iga #13 i le 2001, e auala i se palota la’itiiti. O ia sa avea ma Sui o le Au Palota Taito’atasi i lona suafa o Niko Lee Hang. Na filifilia ai i lea lava paeā’iga e avea ma Minisitā Lagolago o Fa’amasinoga se’ia o’o atu i le 2004; ona toe fetu’una’i ai lea o tofiga, ma avea ai ma Minisitā Lagolago o Tupe Maua se’ia o’o atu i le 2006.

Na toe pale mai Tapunu’u i le faigāpalota o le 2006 i le Paeā’iga #14 a le Palemene, ma filifilia ai e avea ma Minisitā o Tupe. O le Paeā’iga #15 i le 2011 na toe filifilia ai fo’i o le Sui mo le Au Palota Taito’atasi, i lona suafa o Papāli’itele Niko Lee Hang, ma tofia ai e avea ma Ta’ita’ifono o le Komiti o Tupe a le Palemene.

O le 2016 ina ua suia nofoa mo Palota Taito’atasi, na tula’i mai ai Papāli’itele Niko Lee Hang o le Sui o le Paeā’iga #16, mo Nu’u Tu Taulaga i Sasa’e. Sa tofia ai e avea ma Minisitā o Galuega, Felauā’iga ma Atina’e Tetele. E tu’umālō nei le afioga i le Faipule, o avea ma sui o le Komiti o Tupe i le Paeā’iga #17 lenei a le Palemene.

O le saunoaga fa’ataupou a Tapunu’u i le Maota Fono o le Palemene i le Aso 17 Ianuari, 2002 na ia fa’aigoaina o se lauga e vavae ai foe, o se fa’afiafiaga umi o lo’o fa’aauau. O lana saunoaga lea, e atagia ai nisi vaega tāua e fa’amatalaina ai le afioga iā Tapunu’u ma lona soifua galue.

O Tapunu’u, o le tagata loto mauālalo, laufofoga fiafia ma tausa’afia. Na te silafia pe a fausala lona finagalo, ma e vave ona fa’amālūlū, ma teuteu ma fofō alamea se matā’upu. O Tapunu’u fo’i o se tamāli’i loto tele ma e finau malosi, pe a fuafua atu i fa’amaumauga o ana saunoaga i le Palemene, ma ana galuega ma su’esu’ega sa ia fa’ama’ite, na afua ai nisi o fa’ai’uga tetele a le Mālō i tausaga ua mavae.

O lana ulua’i fa’afetai lava i le Palemene na ‘ave i le Atua i le filifilia o ia e tauala mai i lona Itumālō, e avea ma Faipule o le Maota Fono o Samoa. Na tula’i mai e fai ma Sui o le au palota ta’ito’atasi o e pāpā ‘ā’ao i le talafatai o Apia ma nu’u tuāoi. Sa matauina lona finauina o matā’upu tau i le atina’e o pisinisi ma fefa’atauā’iga, ma le si’itia o tomai mo’omia e tagata faigaluega.

O lona fa’atoā tula’i mai i le Palemene, na ia talosagaina ai nisi o vaega ua fa’ataunu’uina nei mo tagata palota ta’ito’atasi, lea e aofia ai le tu’uina atu o nisi o fanua o le Mālō i Tafa’igata mo nisi o i latou sa alala ma pāpā ‘ā’ao i Sogi, fa’atūina o le Sui o le Mālō ma le Sui Tama’ita’i mo Elise Fou, tu’uina atu o le suāvai mamā mo A’ele, Aleisā ma isi afio’aga o lona Itumālō. O lana saunoaga lava lea, sa ia fesiligia ai pe aisea ua lē resitala uma ai tagata ua atoa le 21 tausaga ma ua agava’a e palota. O lea fesili, na fa’atupu manatu i teuteuga o le Tulafono o Faigāpalota, mo i latou ua atoa le 21 tausaga.

E anoanoa’i Tulafono a le Palemene sa lotolotoi ai Tapunu’u. E lē gē fo’i e fa’aali lona finagalo e tusa lava pe le o gatasi ma ni fa’atatauga a le to’atele.

I ona tofiga fa’aMinisitā, sa tau’aveina e Tapunu’u nisi o Matāgaluega tupito ma tāua a le Mālō. Sa gafa ma le lufilufiina o le tamāo’āiga ina ua avea ma Minisitā o Tupe, ma galuega tetele a le Mālō ina ua tofia e avea ma Minisitā o Galuega.

O le tamāo’āiga o le malosi’aga lea o so’o se atunu’u, auā e fa’alagolago i ai ana atina’e ma le soifua lelei o tagata uma. Ou te taofi, sa matuā fa’aāoga lelei e le afioga i le Ali’i Faipule ona tomai fa’atausi tusi ma su’etusi, e fa’asoasoa ai lo tatou tamāo’āiga i lenā vaitau.

O galuega tetele e pei o le fausia o le malae va’alele i Faleolo, fa’aleleia o Uafu fa’avāomālō ma va’a e femalaga’i ai le atunu’u, fa’ao’oina atu o le suāvai mamā ma le ‘eletise i ‘āiga o le atunu’u, auala galue, ‘apovai ma auala simā u’amea i le atunu’u, o nisi ia o galuega iloga sa ta’imua ai Tapunu’u a’o avea ma Minisitā o Galuega i le Paeā’iga talu ai. E tele isi galuega o lo’o fa’amauina, aemaise lona tali atu i manaoga e autova’a mai ai le atunu’u mo se fesoasoani.

E tu’umālō nei le Ali’i Faipule ua 21 tausaga o avea ma Faipule o le Palemene. O lona uiga o se tasi o toe ulutaia o le Palemene. Ua lava fo’i lona tomai ma le silafia i galuega fa’apalemene ma galuega fa’aMinisitā.

Ina ua si’isi’i le tai i se tasi o matā’upu talu ai nei i le Palemene, ma se tasi o afioga i Minisitā, na fa’ai’u lava le saunoaga a Tapunu’u e faapea, “o ā tā’ua galuega lelei, tau ia ina ia ta mitamita ai ma omiomi i lalo, ina ne’i lē maua ai se vi’iga o le Atua”. O se tamāli’i na ia amanaia le va lelei o Faipule o le Palemene, ma le mamalu o felafolafoā’iga a le Maota.

Ae sa ta’i lana silasila ia sili le vi’iga o le Atua i lana tautua mo Samoa. O lea o lo’o silafia e le Susuga iā Pastor Inu ma le Ekalesia, o Tapunu’u sa tautua mo le Atua ma fa’aāoga lelei ana taleni e auauna ai i le galuega a le Atua.

Le pāia o ‘āiga, paolo ma gafa, le Faletua ma le nofoāalo, e lē itiiti le fa’afetai o le tatou Mālō i la outou lupe fa’alele – le Tōfā iā Tapunu’u. Fa’afetai le tapua’i, fa’amālō le faitatalo, a’o feagai le Ali’i Faipule ma ona tiute fa’alemālō.

O la outou taulaga lava lea ma le tautua mo si o tatou atunu’u. Lau afioga i le Faletua ma le nofoāalo, fa’afetai le lototele ma le onosa’i i le tele o nei mau tausaga sa ofoina ai le soifua o Tapunu’u, e tautua ai lona atunu’u.

E tele fatia ma fītā, o lu’itau o le galuega sa feagai ma Tapunu’u. A’o tofiga a le Atua, e faae’e atu i lē ua tatau i ai, ina ia galueā’ina ma le fa’amaoni. Lea ua mae’a ana galuega, ua tautalaaso, ma e manatua pea.

Amuia oe Tapunu’u, ua tuta lou sa folau ma ua tau i matagofie. Mālō fa’afetai mo au galuega ma lau tautua mo Samoa. Fo’i ia le agaga i le Atua, se’ia o’o i le aso o le Toetu.

O le toe ‘upu, ia fa’amafanafanaina le pāia o ‘āiga, le Faletua ma le nofoāalo, lau Susuga i le Fa’afeagaiga ma le Ekalesia, fa’apea le tatou Mālō. Ia tatou maua pea le fīlēmū ina ua o tatou mautinoa ‘o le lagi o lo’o tatou nu’u moni o lo’o fa’atali mai ai lo tatou Fa’aola o Iesu Keriso.

Ia manuia tele toe sauniga o le afioga i le Ali’i Faipule.