Saunoaga ale Palemia e tusa ole lipoti ale Komiti Fa’apalemene

Lau Afioga i le Fofoga Fetalai, fa’afetai mo le avanoa e faia ai se manatu e tusa ai ma le matā’upu o lo’o i luga o le laulauāfono a le Palemene.

Fa’alogologo lava ma le toto’a i le folasaga a le Ta’ita’ifono, ua folasia mai ai le lipoti aemaise o se fautuaga ua tu’uina mai e fai i ai se filifiliga a le Palemene.

Fa’alogogo fo’i ma le toto’a i le saunoa mai o sui mamalu o le Palemene, lea ua tauāluga i le saunoaga a le Sui a Faleata #3 o se tasi o lo’o fa’asino i ai le tatou matā’upu lenei.

Lau afioga i le Fofoga Fetalai, sa fa’asolo fo’i lo’u mafaufau, pe umi se tala pe pu’upu’u se tala, ae i le tāua o lenei matā’upu mo le aga’i i luma, e pei fo’i ona outou saunoa mai ai, atonu e ao lava ona fofola le tatou fala ma tatou talanoa.

O le matā’upu lenei e fa’asino i le solia o tulaga aloā’ia ma amio tauāloa o le Palemene. E ui o lo’o tautalagia le fa’ai’uga o le fa’amasinoga i le solia fo’i o le mamalu o le fa’amasinoga, ae ao ona muamua ona ou fa’apea atu lau afioga i le Fofoga Fetalai ma le mamalu o le Palemene e ‘ese’ese malae.

Sa fa’asolo le fa’amasinoga ma fai lana fa’ai’uga, o le matā’upu lenei o le matā’upu a le Palemene. Pe feso’ota’i ona ua avea nisi o moliaga ua atagia ai le lē talafeagai o le amio po’o ‘upu ua lafo e Faipule o le Maota, lea e gata ai iinā. Ae lē aumaia fo’i le fa’ai’uga a le fa’amasinoga e faia ai le fa’ai’uga a le Palemene.

E manino lava i le tatou matā’upu, pe ua solia tulaga aloā’ia ma amio tauāloa o le Palemene.

O le a le tali lea ua aumai e le lipoti a le Komiti, Ioe ua solia.

Lea la ua aga’i i ai le tatou fa’asoa o lenei aso, o ā aulape?

Lau afioga i le Fofoga Fetalai, ou te fia tautala pu’upu’u i le Harmony Agreement po’o le maliega, e ao ona ou fa’amanino. O lea maliega na fai i le va o Vaega Fa’a’upfai e lua ma saini ai maua ma Tuila’epa o Ta’ita’i. O lenei maliega, o se maliega fa’aletulafono i matā’upu o le tulafono o le fa’amasinoga.

Na fa’atino le fa’asologa o maliega, ‘ave i tua tagi o matā’upu tau palota. O matā’upu tau palota i le fa’asologa lona lua o tatou palota lāiti. O tagi sa fa’asaga ia te a’u ma le afioga iā La’auli ma le afioga iā Leatiunu’u i lalo o public prosecutions ma fa’apea fo’i ona mālilie mai lenā itu e ‘ave’ese a latou tagi o le contempt of court, mo le solia o tulaga aloā’ia o le fa’amasinoga, ‘ave’ese e matou, o moliaga lea sa fa’asaga i lenā itu.

Na ‘ave le mana’o o itu e lua, sa tau’ave e loia i le matā’upu o le contempt of court ua i ai le maliega lea e fa’asolomuli mai le matā’upu lea.

Ae tali mai le fa’amasinoga e lē talia e fa’aauau pea e le fa’amasinoga.

O le uiga la o lau fa’amatalaga lau afioga i le Fofoga Fetalai na fa’atino tulaga o le maliega. O le finagalo o le fa’amasinoga e fa’aauau le fa’amasinoga o le mea lenā a le fa’amasinoga.

Ae na fai le galuega ma le gaioiga a le itu lenei e tauala atu i matou loia tu’ufa’atasi ma loia a lenā itu e fa’asolomuli le matā’upu o le contempt o le mea muamua lenā. Ia ma le isi lau afioga i le Fofoga Fetalai, o lea maliega e mo matā’upu sa i luma o le tulafono, matā’upu tau palota.

Na aumai i pepa o le tali a le Ta’ita’i o le Itu Agai ma le afioga i le faipule o Faleata #3 fa’apipi’i mai ai le kopi o le maliega lea.

O lea maliega, e le’o le maliega lenā lea e fa’apipi’i mai i le fa’ai’uga a le fa’amasinoga. O le pepa lea e fa’apipi’i mai i le fa’ai’uga a le fa’amasinoga, na’o se aotelega i le agaga o le tausiga o le fīlēmū.

A’o aiaiga o le maliega, lea na fa’apipi’i mai le pepa lea na aumai e Tuila’epa ma Lealailepule mo le Komiti. O lona uiga o se maliega na fai i le matou va o lea ua tatala atu e tauala i le tali a faipule i le matā’upu lenei.

Sa matou tausia le confidentiality o le maliega lenei, a’o lea la ua i tua ma ua silafia, ma ua tele fo’i ‘upu ma tala ua fai i ai i le maliega lea. Ou te fia tautala lau afioga i le agaga lea e aumai e fa’avae i luga o le tausiga o le fīlēmū, lau afioga i le Fofoga Fetalai ma le mamalu o le Palemene, ua taunuu le fa’amoemoe lenā i mea tau palota.

Auā e a? Ana leai le maliega lea, e lavevea lenā itu aemaise le Ta’ita’i, e lavevea fo’i le itu lenei, Ta’ita’i o le Mālō, Minisitā o le Kapeneta. O ā la a’afiaga pe ana taunu’u le mea lenā, e leai se fīlēmū.

O la’u tali lenā ma le fa’aalolao lau afioga. Na tau le fa’amoemoe o le maliega lenā ua fa’afīlēmū auā o le fesili o fea le mea e taunu’u i ai ‘upufai o Mālō ma le vevesi lea tatou te talanoa ai i le tatou palota talu ai, ae faimai ua pa’ū le Palemia, ua pa’ū ana Minisitā e lua, ua pa’ū ma ua ‘ave i le falepuipui le Ta’ita’i o le ituagai ma le isi Sui Sinia o le la itu.

O le fesili, ana taunu’u le mea lenā tatou te maua le agaga o le fīlēmū lenā tou te saunoa mai ai. A’o la’u molimau e maua i le itu lenā. Tatou la’a mai loa ii i le tatou va feagai ai o tatou o Sui o le atunu’u. Lau afioga i le Fofoga Fetalai, ‘upu ma tala, uma le fa’amasinoga o ā fa’aāliga na fai mai e le Ta’ita’i ma le Sui Faipule o Faleata #3.

Muamua, leai se fa’amasinoga, 2. e leai se fa’amaoniga o le soligātulafono. Lau afioga i le Fofoga Fetalai o le lona tolu, e lē avea le fa’ato’esega na ‘ave i totonu o le fa’amasinoga lea, e fa’apea e ioeina ai e fa’apea ua faia se solitulafono.

O mea na e tolu lau afioga i le Fofoga Fetalai o ata aliali ia e lē fa’aaloalogia lava le Tulafono, e lē gata i lea, ua olegia le atunu’u faimai e le’i faia se fa’amasinoga e le’i fa’amaonia se soligātulafono, ma ua faimai a matou fa’ato’ese, e le’o se ioeina lenā o se solitulafono.

‘Upu ia na fai ina ua uma le fa’amasinoga. O’o mai luma o le Komiti lea e saunoa mai ai le Ta’ita’ifono lea e momoli mai ai ‘upu nei, lau afioga i le Fofoga Fetalai, afai a i fea, a fai mai Tuila’epa, faimai Lealailepule o le mea lea ma le mea lea, o le sa’o lea.

Ua saunoa mai nei lenā itu fa’apea mai sa’ili lou ai Fiame, lau faigāmālō, a’o la’u tali lau afioga i le Fofoga Fetalai, Ioe! lea e tau su’e se ai, ae le’o se ai e mitamita ai, a’o se taumafaiga ina ia manuia le atunu’u.

A’o la’u fesili lau afioga i le Fofoga Fetalai ma lenā itu o le Maota, e fa’afefea mavaega tu’ua. O ā mavaega? A faimai lava le fa’amasinoga o le mea lea ma le mea lea, ae faimai le Ta’ita’i o le itu agai ma le Sui o Faleata #3, leai e ‘ese, talitonu ma i i le ma tala lea e faiatu. O ni ‘upu ma ni tala ma ni uiga ia e atagia ai le fa’aaloalogia o le tulaga.

Le isi uiga tausili lea e faimai le tatou tautoga e tatau ona tatou faia, fa’aaloalo i le fa’amasinoga. Ta’atia ‘upu na fai i le fa’amasinoga, ta’atia ‘upu na fai iā matou a’o le uma o le fa’amasinoga, ta’atia le fa’ai’uga, ae faimai e le’o le mea lenā.

Le Vaega e Puipuia Aiātatau a Tagata, le mavaega tu’ua, mavaega a lo outou nofoā’iga ua totō le fatu lea ma ua tupu laulau le lā’au ona manatu lea, a faimai a le tala e sesē, o lenā, ona o lea tou te faimai ai, lea e faimai ai le tou Ta’ita’i, e lē sa’o, e lē amiotonu lenā mea.

Mavaega tu’ua faimai e tuli se matou ai, ae Talofa e, e taumafai e tuli le ai, a ua totō le fatu lea i totonu o Samoa.

Ua totō le fatu lea i totonu o le Palemene, e pule lava, ioe, e tulaga ‘ese, it’s a privilege. A faimai le Ta’ita’i o le Vaega Fa’a’upufai lenā, o le sa’o lea, o le mea lea, ona ua ou fai atu ai lea, Talofa e! Ia Samoa. Ioe, totō le fatu, e mafai ona fai tala e solia ai le mamalu o le fa’amasinoga ma solia ai le mamalu o le Palemene lenei.

Lau afioga i le Fofoga Fetalai, ou te leiloa po’o le a le sesē o la’u tala lea e fai atu, ou te leiloa po’o le a le sesē i le fa’afofoga mai a le atunu’u i ‘upu ma tala ia, ua pei o se mea ula le fa’amasinoga le la.

Ua tu’umāmāina le tiute, valā’auina ma le tofi o le Faipule ua so’ona fai ai lafoga fa’apea.

Lau afioga i le Fofoga Fetalai, talofa i la outou saunoa mai, fa’agalo tatou aga’i i le lumana’i. Ae ou te fa’apea atu lau afioga i le Sui Ta’ita’i ma le mamalu o lenā itu, ua maua’a le mavaega tu’ua a le Vaega Fa’a’upufai lenā i totonu o le Maota lenei ma totonu o Samoa ma lana fa’afofoga’aga.

O le sa’o lea, e mafai ona osofā’ia le tulafono, e mafai ona fa’aāoga le malosi o le tofi e fai ai mea e lē tatau ona fai, ae amata atu lava iinei i sui o le Maota lenei.

Lau afioga i le Fofoga Fetalai, a fa’apea tatou te fesili o le a le fua? I lo’u lava taofi, e tatau ona tu’u se fua maoa’e e taofi ai le fatu lea ua ola. Ua tatau ona se’i mai ona a’a i totonu o le Palemene lenei. Saunoaga i totonu o le Maota lenei e lē milia fa’au’u a tatou ‘upu.

Lau afioga i le Fofoga Fetalai, fai le ‘upu ma le tala lenā i feiloā’iga a ‘āiga, nu’u fo’i ma afio’aga ona e vāvālalata, ae a saofa’i loa le mamalu o le atunu’u i le Maota lenei, fa’aeteete le tagata i lana tautala, ae ua sola le mea lenā, leai se fa’aaloalo, ua avea le malosi ua fa’aāoga sesē ai le tofi ma le valā’auina i le tofi Faipule.

Lenei a taeao fai fo’i ma fa’ata’ita’iga o ‘upu ma tala e ta’ita’isesēina ai le fa’afofoga a le atunu’u tainane le Maota lenei, le saunoaga a le Sui Ta’ita’i e leai se isi e lavea fa’alua, o lea ua fa’apea mai, o lea ua lavevea Sui Faipule nei e to’alua i le fa’ai’uga a le fa’amasinoga a’o lea fo’i ua toe fai atu i le tatou matā’upu.

Lau afioga i le Fofoga Fetalai, o le Sui Ta’ita’i o le Itu Agai a’o le loia, e lē avea le loia ma ala na te aumaia ai ni itu’āiga fa’a’upuga ia, e lē lavea fa’alua, e leai se isi e lavea fa’alua, ona o la sa fai i o ae ‘ese a inei, ae o le isi fa’ata’ita’iga lea, o itu’āiga fa’amatalaga e aumai, ma atagia mai ai e fa’apea e lē iloa e le Palemene lenei le ‘ese’esega o mea, lau afioga i le Sui Ta’ita’i o le Itu Agai, e tele vale ae lē vālea uma fo’i.

O le mea lea e fa’apea, o outou lava finagalo, sa’o, ae fa’amolemole se’i aumaia se mea tonu, o na e te silafia lelei a le mea e tau o le double jeopardy a’o le fa’ata’ita’iga lea o le faiga lea e fai, e fai o inei i le Maota, ae fai fo’i i le atunu’u.

Lau Afioga i le Fofoga Fetalai, o lea ua fa’apea mai e le’o iinei le susuga iā Tuila’epa e tali fuaitau, lea ua fa’amalamalama e le afioga i le Ta’ita’ifono, maua le avanoa o tali tusitusia fai to’alua ma le sui o Faleata #3.

O le isi fo’i mea lea e to’alua i lāua ae tasi le la tali, ae fa’afetai o lea ei i le Sui Mamalu o Faleata #3, i le ma le isi, Lau afioga a tatou o fo’i e fai ma fa’ata’ita’iga o le fa’amasinoga lea na faimai Lealailepule e le’i faia se fa’amasinoga na’o le iloiloga, e le’i mana’omia ni molimau na fai le fa’amasinoga lea i luga o molimau tusitusia ma fa’amauina fa’aletulafono, maua ai le atoatoaga e fai ai le fa’ai’uga fa’apenā fo’i le matā’upu a le Palemene lenei.

O la’u ‘upu mulimuli i le tatou matā’upu lau afioga i le Fofoga Fetalai, o le fautuaga ua tu’uina mai e le Komiti ina ia tu’u’eseina Sui Faipule se’ia i ai se aso, o lea na naunau mai nisi o finagalo ia uma nei, fai se fua fai se fa’ai’uga, fesiligia fo’i le sao o lea fautuaga se’ia i ai se aso , ma aumai ai tulafono tumau.

Lea e manino, pule le Palemene i le taimi e fai ai ana fa’asalaga o lona uiga o le se’i i ai se aso o le taimi fo’i lea. O le saunoa mai e lē uma nei, ma e fa’aauau, ioe e lē uma nei. E lē uma nei auā e lē mafai lava ona tu’u’esea le amio, ioe, le amio lea e tula’i mai pea, a ia i ai se taimi tatou te mata’itū ai pe i ai se āoga o le tatou fa’asoa lea na fai nei.

Pe moni ‘upu o le tatou fa’asoa lea na fai nei, auā ana faimai nei le Komiti, o le a le taimi, ae avatu se finagalo o le maota ma fa’apea atu, ia le nofoā’iga atoa. A’o lea e maua atu i le agaga o le fa’ai’uga le mea lea ou te maua atu ma o lo’u fo’i faamoemoe lea, tatou tilotilo lelei i le mea lea e tupu i totonu o le Maota o Samoa, auā e lē uma, auā tou te saunoa mai lava a lea e sau a le si’uleo o le amio lea.

A fai o outou, e tulaga ‘ese, ou te leiloa po’o le a le tulaga ‘ese lea e aumai ai le fua lea. Ae na’o le tasi a le fua o tatou tulafono tumau o le aloā’ia o le tulafono ma le fa’amasinoga o le mea lenā a le Faipule Samoa e fai.

Ae ou te fa’amalie atu lau afioga i le Fofoga Fetalai, ou te leiloa, ou te leiloa, pe mafai ona fa’afo’i mai le mamalu o le Palemene.

Ae o le naunautā’iga lenā, ia avea le matā’upu lea e fai ma lamepa e mumū pea tatou te tilotilo i ai pe moni a outou saunoaga pe moni le fa’amoemoe, auā lau afioga i le Fofoga Fetalai, aumai le maliega o le harmony, o le mea muamua o le harmony e le’o se ‘upu lenā o le feagaiga na saini ai māua ma Tuila’epa, ae a fa’ataunuu le mea lea e talosaga mai ai e fa’aāoga le harmony agreement, lau afioga i le Fofoga Fetalai, ou te fa’amālūlū atu, o le a avea lea ma alofaga i le tatou aga’i i luma, a manatu a le Faipule ia e soli pala le Palemene ma soli tulafono tauāloa, fa’alālā mai le harmony agreement, e le’o le fa’amoemoe lenā lau afioga i le Fofoga Fetalai.

E fa’ai’u atu ai se matou fa’amatalaga, i lo’u tulaga o a’u o le Faipule, o le Faipule o le Itumālō o Lotofaga o le mea muamua lea, e pei lava o ā outou afioga, le tatou faitotoa lea, le Maota lea mo tatou itumālō ae ou te tautala fo’i ma le fa’aaloalo o a’u o le Ta’ita’i o le Mālō ou te talia ai le fautuaga a le Komiti ua fa’ata’atia i luma o le Maota ma e talosagaina e tu’u mai loa le fesili ina ia talia aloā’ia le lipoti.