E muamua ona fa’afetai atu i le afioga iā Tuātagaloa ma le Komiti mo le avanoa e fai ai se tala i lenei aso ma lona tāua. Ou te manatu o pāia ma sā o le taeao o le a ta’oto ia fa’amaene o tai loloto, auā o pāia mai le vavau e o’o lava i le fa’avavau. Tulou le susū o ā oulua susuga i fa’afeagaiga taulagi.
Fa’afetai i lau susuga i le Ta’ita’i o le Sauniga ma le pāia o le aufaigaluega totofi a le Atua mo le taulaga osi o lenei taeao. Tau ia o se ‘upu e pa’ū i le ‘ele’ele lelei ia tupu ma ola i loto o i tatou uma ua mafuta mo lenei fa’amoemoe.
O le asō e atoa ai le 15 tausaga o lenei polokalame, talu ona fa’atino polokalame o galuega fa’avaitaimi. I le amataga, sa māua na’o Falealili le afio’aga sa maua avanoa mo galuega fa’avaitaimi e ‘ese mai aumalaga a Ekalesia ma Fa’alapotopotoga. A’o lenei ua fa’asopolia le tele o nu’u ma afio’aga e autova’a e sa’ili avanoa mo galuega fa’avaitaimi i atunu’u e mamao.
E le gata i lea, a ua molimauina o se polokalame ua mautū le fa’avae ma lelei lona tapenaina. O le pine fa’amau o lo’o maitauina, a’o le’i tu’ua e fanau le afio’aga mo galuega fa’avaitaimi, e muamua ona tapena asiasiga ina ia mautū fa’ato’aga a ‘āiga e tua i ai. A toe taliu mai i atunu’u mamao pe a mae’a galuega fa’avaitaimi, e lē tu’u aunoaina e le Komiti.
E toe sa’ili fo’i po’o fa’aāoga ma le tatau le tamāo’āiga sa maua i lea fuata ma lea fuata. O lenei galuega tulituliloa ma le mata’itūina pea, e atagia ai pulega lelei i le fa’afoeina o lenei polokalame ina ia faifaipea lona āoga.
E talitonu, o se fa’ata’ita’iga sili lea mo nisi o afio’aga ma vaega o lo’o tapenaina polokalame mo galuega fa’avaitaimi i atunu’u e mamao. E le’o toe po le silafia i mea o tutupu ma aliali mai i atunu’u e mamao, e mafua mai i le fa’atuatuana’i i tapenaga lelei.
O se tasi o va’aiga matagofie o lenei taeao, o le anoanoa’i o ta’avale fou aemaise ai i le aga’i atu i sisifo ma sasa’e i le tele o atufālega fou. O nisi ia o molimau ola o le polokalame lenei.
O lo’o māua fo’i lau afioga Tuātagaloa, o lo’o fai le tou fuafuaga i le tausiga ma le fa’aleleia o le si’osi’omaga. O le tele la o tatou ta’avale ia ua tula’i mai, mo outou ia ua aga’i atu i fafo, o le isi la’asaga lea ua aga’i atu i ai le Mālō i le puipuiga o le tatou si’osi’omaga, o itu’āiga ta’avale tatou te fa’aāogaina. Ua i ai fausaga o ta’avale fou, e alu i le ‘eletise e lē toe alu i se suāu’u. O mea lenā tou te fuafua mamao i ai mo le tatou polokalame.
E manatua fo’i ua fetaui le fa’amanatuina o lenei polokalame, ma le i ai pea o lo tatou atunu’u i le fa’amanatuina o le Tuto’atasi o Samoa. E momoli lava le fa’amālō i lenei afio’aga o Poutasi ona o la outou lagolago ua saga mautū ai lenei fa’amoemoe.
E fa’amālō i alo ma fanau o lo’o autova’a atu i lenei polokalame, ona o le usitā’ia o aiaiga ma tulaga uma ua mafai ai pea ona agava’a Falealili e fa’aauau.
Mo outou tamafanau a le atunu’u, o e sa malaga atu po’o e o lo’o fuafua fo’i e malaga mo galuega fa’avaitaimi. E lē faigofie le galuega, e pei ona māua mai i le saunoaga a le Ta’ita’ifono, o galuega e mamafa.
E lelei ona taui e pei ona tatou fa’alogo ai i le tulaga tau tupe, ae e i ai fo’i ona tau i le tulaga o le to’esea ma ‘āiga, motusia o mafutaga, ma lu’itau o le galue ma le nofo i atunu’u mamao.
Ae peita’i, o le tāua lea o lipoti ua maua i lenei taeao i le lava tapena ae le’i autova’a ‘ese i le fa’amaopopo ma le i ai o Ta’ita’i i totonu o tou vaega galulue e fa’amanatu ma tulituliloa pea uiga tausili o le tu ma le aga Samoa lea tou te soifua ai i totonu o tou ‘āiga, nu’u, ma afio’aga.
Mālō le galulue, fa’afetai, auā o la outou galuega, nei te’i ua tou fa’apea na’o outou a ma a outou ‘āiga, lea ua tatou māua i lenei taeao, e tele lo outou sao i le tou nu’u ma le itumālō. Ae na fo’i tou te silafia, i le fa’asologa ma le fa’agaioiga o le tamāo’āiga e fa’apenā ona sosolo atu le tou sao e tauala i lafoga i luga o fefa’atauā’iga, lo outou sao i le tamāo’āiga lautele o Samoa. Ina te’i ua tou fa’apea e vāapiapi lo outou sao mo le manuia o si o totou atunu’u.
O le talosaga, o le igoa o le polokalame lenei, o galuega fa’avaitaimi, e le’o se avanoa e tu’uva’a ‘ese atu ai ma tou malaga atu ai lava ma nonofo ai i atunu’u la. O le fa’amoemoe e avea avanoa o galuega fa’avaitaimi e toe fau ma toe fa’amalosi ai fa’avae o tou ‘āiga ta’itasi.
O le tala fa’ata’ita’i a Tuātagaloa, a e ‘ave le i’a i le tagata i le aso lenei e toe mana’o fo’i, e toe taumafai fo’i e ‘ave le isi i’a taeao ma le isi aso. Ae a a’oa’oina le tagata e fagota e mafai lava ona tau’ave e ia lona mana’o i le lumana’i. O le mea na e tupu i le tou galuega lea e fai ma le taumafaiga a Tuātagaloa ma le Komiti ina ia a’oa’oina outou, o faifaiva mo le lumana’i e tausi ma tuto’atasi lo outou tamāo’āiga e fa’aauau ai.
Ma o le manatu fo’i lenā o le Malo, i la outou vasega i tamafanau, I lenei taimi o lo’o tou malolosi, toe fau, toe a’oa’o auā le lumana’i o oe ma lou ‘āiga, ae toe fo’i mai e fau le tatou atunu’u. E leai a nisi e faia le tatou atunu’u, e fai lava e tatou ma e telē lo outou sao e tauala i le tou galuega o lo’o fai ma le fa’afaigaluegaina o le tamāo’āiga lea tou te tautigā ai i lenei taimi. O le fa’afaigaluegaina aga’i i le lumana’i o le tamāo’āiga lea ua tou a’oina mai. O le talosaga lenā a’o maua lou taimi, toe fo’i mai e fau lo tatou atunu’u. O le tagata lava ma lana galuega, tatou te so’oso’o tauau e toe fau lo tatou Mālō auā lo tatou atunu’u lautele.
Talu ona ou Palemia, fesili mai tagata ia te a’u, o le a sau va’aiga Fiame mo Samoa, o la’u tali, ou te mana’o i se Samoa e fia nonofo ai tagata Samoa, e fau e le tatou atunu’u. E pei e i ai se ata, a tatou o i fafo, o le manuia lenā, atonu e i ai itū e moni ai lenā mau, ae o le tatou ola ma soifua ai pea fa’apenā, o le manuia la i fafo?
Le tatou potopotoga, o lea tatou te talatalanoa i Falealili, o lea tou te nonofo i tou fanua ma ‘ele’ele fa’asamoa, e leai se totogi, a tou nonofo i atunu’u i fafo, e tupe a mea uma.
E te faigaluega mai i le taeao e o’o i le afiafi o e faigaluega, ona a motusia le galuega e lē mafai ona e ola ma e soifua lelei. Ae silasila lelei i ou autafa, po’o a tatou manuia lea i Samoa, a’o a mea e mana’omia ai le fesoasoani. A ua tatou leiloa le manuia lea e i luma o tatou, e tatou te tau su’e i fafo, ona ma’imau lea o le tofi na fa’asoa mai e le Atua mo i tatou.
Falealili, afai ua outou amata mea i le polokalame lenei, ma ua tumatila la outou taumafaiga ua ata mai le manuia, tatou ‘ave lenā e fau ai se Samoa tatou te fia nonofo ai a tatou. O le feau lenā o lenei taeao.
O ‘upu fa’ai’u, ia agalelei mai le Atua i lenei fa’amoemoe. Ia fa’amanuia i le afio’aga i ona tulaga fa’alupe aemaise o le au Ositaulaga o le Talalelei. A tu’uama le fua ma ta’ape le fili ali’i, ia malutia pea le soifua ma lo tatou ola i le pule fa’asoa a le Tapa’au Sili.
Ia manuia le atoaga o le 15 tausaga o le polokalame o galuega fa’avaitaimi a le afio’aga nei.
Soifua.
