Saunoaga Autu a le Afioga i le Minisita, Toeolesulusulu Cedric Schuster mo le tatala aloaiaina o Sailini mo Lologa (GCF Vaisigano Catchment Project) – 28 Novema 2022
Lau Susuga ile Taitai o le Sauniga, Susuga Sale Uelese
Jorn Sorensen, Faauluuluga o le Ofisa o Malo Aufaatasi i Samoa
Afifio Paaga Faalemalo
Faauluuluga o Matagaluega ma Faalapotopotoga
Le mamalu o le aofia ua tatou faatasi
Ua fa’apōpō a o ni aso ua, ae ua le tu’ua aso folau. Ua ou tu lili’a nei i le tu ma ua maniti tino i pisaga aua le paia maualuga o le asō. E fai a’u ma sui o le Malo e faatalofa atu ile paia ma le mamalu ua sasao nei. Ua tatou potopoto mai ile asō e molimauina se tasi o matati’a taua i le taumafaiga faifaipea e faaleleia atili auala e vave ona lapataia le atunuu, ia faatupulaia le puipuia ma saogalemu o Samoa mai faalavelave matuia ma faalavelave tutupu faafuasei.
Na umi se taimi o tau faagasolo mai lenei galuega ma o se fiafiaga tele ia te a’u ua faataunuuina le faatutuina o sailini e lima mo lologa i le apovai/vaitafe i Vaisigano.
E $603,483 tala Niu Sila le tau atoa o lenei galuega. E le faaititia le faafetai i le Ofisa o Malo Aufaatsi (UN) e auala mai le Polokalame Atinae o le Green Cimate Fund (GCF) mo le faatupeina ua mafai ona faatino ma faamaea ai lenei fuafuaga. E momoli foi le faafetai ma le faamalo i le Kamupani o le MCS Niu Sila na faakonekarate e faatau ma faapipiina ia sailini.
O le tausaga e 2017 na amata ai le Polokalame Atinae lenei o le GCF i Apovai ma Vaitafe Vaisigano mo le ono tausaga. O le auga ma le faamoemoe o lenei polokalame ia ausia le “Faamalosia le gafatia ma le faaitiitia o le tulaga lamatia mai le tau ma faalavelave matuia o soifua, aseta ma le siosiomaga o tagata o loo afifio latalata i laufanua apovai ma le vaitafe o le Vaisigano”. O le faapipiina o nei sailini mo lologa o se laasaga taua tele ile ausiaina o le sini autu o lenei poloketi.
O le faamoemoe laualuga mo nei sailini, e lapatai ai le mamalu o le atunuu o lo’o alala ma pāpā aao i afioaga o lo’o aofia i totonu o Laufanua Apovai o le Vaisigano, pe a tutupu mai lologa e afua mai i timuga mamafa, afā ma tafega o le vaitafe o le Vaisigano. E tolu ni vaega mo Lapataiga o nei sailini:
- O le Leo e faae’e mo le 5 minute
- O le Leo e tautala mai ai faasilasilaga ma lapataiga
- O le Moli lanu mumu e emoemo e faailoa mai ai le lapataiga
E mafai foi ona faaaoga mo isi faalavelave matuia e pei o sunami, afā ma mu matautia. Ua faatutūina i nofoaga e 5, e aofia ai iinei le lotoa a le Matagaluega o Aoga, Taaloga ma Aganuu; o le nofoaga ole EPC i Tanugamanono; o le fanua faasao o le Malo i Magiagi; o le malae taalo o le Apia Park; faapea Lalovaea.
O le taimi muamua lenei ua faatutūina ai ni sailini mo lologa. Ua maea foi ona faaofiina i le fesootaiga o sailini (network) mo faalavelave faafuasei e iai sunami e pei ona iai. Ma e tele se fesoasoani a nei sailini fou ile tatou fesootaiga mo le Lapataiga Muamua mo faalavelave faanatura faafuasei (Early Warning System).
Ou te faamamafa ma faataua tele le vaaia lelei o nei meafaigaluega ina ia faatumau le mautinoa o le lelei atoatoa ona e aoga tele mo le lapataiga o le atunuu nei, taeao ma le lumanai.
O lenei matati’a taua ua mautinoa ai le ausia o galuega fuafuaina a le Malo ma aga paaga e pei o le Faletupe o le Lalolagi mo Lapataiga Muamua mo Faalavelave Matuia (MHEWS) e ausia ai sini autu faataatia o le Fuafuaga Autu a Samoa 2022-2026, Taiala a le Lalolagi mo Faalavelave Matuia 2015-2030 ma isi.
Tau ina ia aoga lenei atinae tele e faaleleia atili ai le mafai ona tali atu le mamalu o le tatou atunuu, i aafiaga o suiga o le tau faapea faalavelave matuiā e faaono aafia ai le soifua.
