SAUNOAGA A LE AFIOGA I LE PERESETENE FOU O LE FA’AMASINOGA O FANUA MA SUAFA A SAMOA – LESĀTELE RAPI VA’AI
Aso Lulu, 02 Novema 2022
Lau susuga i le Ta’ita’i o le Sauniga, fa’afetai tele mo le ‘upu folafola mai Afioga Pāia a le Atua, ua tomatauina ai le fa’amoemoe o lenei taeao, agalelei le Ali’i i lou soifua tautua i tiute ma faiva o feagai ai.
Lau Afioga i le Ao Mamalu o le Mālō, fa’afetai i lau afioga mo le fa’afoeina o la’u tautoga. Momoli atu le fa’afetai i le Masiofo, i lau fo’i pitolā’au e fesoasoani ai e fa’amalosi’au i Lana Afioga i le fa’atinoina o ona tiute.
a alofagia e le Atua lou se’ei mai i le tofi, o le Tamā o le atunu’u mo le isi lima tausaga. Lau afioga i le Palemia, fa’afetai i lau afioga ma le ‘āiga Kapeneta i la outou fa’atuatuaga ua outou tusi ‘ā’ao ai i lo’u nei tagata, e tau’aveina le tofi Peresetene.
E lē māmā i lo’u nei tagata le tofiga. E leai se tagata e atoatoa e fa’amoemoe i le fesoasoani mai o le Agaga Pāia, e fa’atupu manatu ma musumusu mai mafua’aga lelei ma le amiotonu e soālaupule ai ni fa’ai’uga tonu ma le sa’o. Fa’afetai tele i lau afioga i le Palemia ma le Kapeneta.
E ao lava iā te a’u ona ou ofoina se fa’afetai mo le sa tula’i mai i le tofi Peresetene, le afioga iā Fepulea’i Attila, e le’o po se lilo ua e si’i i luga le lelei o le fa’atinoina ma le fa’agasoloina o galuega a le Fa’amasinoga o Fanua ma Suafa. Ae fa’apea fo’i ona si’itia le tomai o ali’i ma tama’ita’i filifilia i tofi Fa’amasino.
E te le’i matamuli e tu’ufesili mai i e sa mua i malae, o au galuega lelei uma sa fa’atino o le a fa’aauau ona fai, ae o le a taumafai fo’i e fa’aleleia atili nisimea e tatau ona fa’aleleia. Ia fa’amanuia le Atua i lau afioga, faletua ma le ‘āiga.
E tatau fo’i ona avatu sa’u fa’afetai i lo’u ‘āiga i le tinā ma le fanau. O le tausaga e 1996 na sainia ai e le Ao o le Mālō, Susuga i le Malietoa Tanumafili II, la’u warrant mo le Fa’amasinoga Mauāluga, a’o le vaitaimi lea o lo’o ma to’alua ma le afioga iā Tagaloa Enoka Puni i le Fa’amasinoga Fa’aitumālō.
Na ala ona fai la’u Supreme Court Warrant ina ia ou fesoasoani i le afioga i le Fa’amasino Sili iā Pātū Tiāva’asu’e Falefatu Sapolu i le fa’afoeina o Fa’amasinoga Apili, i le Fa’amasinoga o Fanua ma Suafa.
Ou te lē mā fo’i e ta’u atu, e tigā ona i ai la’u warrant i le Fa’amasinoga Mauāluga ae totogi lava a’u i totogi o le Fa’amasino o le Fa’amasinoga Fa’aitumālō.
Ua silia ma le 20 tausaga sa ou fa’atinoa ai galuega fa’a – Peresetene, na ou mālōlō i le tausaga e
2017, ma ou aga’i ai i Nauru.
