Sefululima isi fomai ua maea fa’auuina e galulue mo le Matagaluega.

SHARE NOW

5 Fepuari,2025 Samoa: O le Aso Faraile na tea nei, aso 31 Ianuari 2025, na tauaao ai e le Matagaluega o le Soifua Maloloina (MOH) ma le Fono a Fomai a Samoa (SMC) tusi faamaonia atoatoa o le lesitalaina o foma’i e to’asefululima (15) ina ua mae’a ma le manuia le latou polokalame sa galulue ai ole latou polokalame e taua ole House Surgeon program mo le lua tausaga.

O lenei fa’amoemoe mata’ina, ua fa’ailogaina ai se la’asaga taua i galuega a nei ali’i foma’i, na mafai ona fa’ataunu’uina e ala i le lagolagosua a le Asosi faafom’ai a Samoa (SMA), lea sa galulue fa’atasi ai ma le Matagaluega e tu’uina atu fesoasoani tau tupe mo le sauniga.

Na tatala aloaia le faamoemoe i le faamanuia a le susuga i le faafeagaiga ia Elder Enefatu Lesā ona sosoo ai lea ma le saunoaga autu a le afioga i le Minisita o le Soifua Maloloina, Valasi Luapitofanua Toogamaga Tafito Selesele.

E faafetaia ma ave se upu faamalosia ile galuega fita sa feagai ma nei fanau e toa sefululima na galulue ai

Ile lana saunoaga autu na ia faailoa ai lona agaga fa’agae’etia ma le loto fa’afetai ua fa’ataunu’uina ma le manuia le fa’amoemoe o alo ma fanau nei o le atunu’u, e fesoasoani ile tulaga ‘uti’uti o iai fomai e tautuaina le soifua maloloina o le atunu’u.

Ma elē taumate ile tele o galuega ma auaunaga o le soifua maloloina e mo’omia le fa’aleleia i lenei vaitau’ auã le tali atu i mana’oga tau le soifua maloloina o le atunu’u, aemaise lava i auaunaga tau foma’i.

Na saunoa le Minisita o fa’anaunauga uma nei a lo tatou malo, e ala ai ona fa’amatu’u mai tupe e fa’atupeina ai a’oa’oga, ina ia maua le tomai ma agava’a mo’omia, auā lava le soifua maloloina o tatou tagata.

O lenei tusipasi e le gata e iloa ai le faamaoni ma le galue malosi o nei fomai ae ua faamalosia ai foi le aufaigaluega tau soifua maloloina a Samoa ao faaauau le latou faigamalaga i galuega faafomai.

Na faafetaia ele Minisita ma le Matagaluega atoa le tapuaiga mau a aiga, faapea mātua o fanau fa’au’u. Aua ole talitonuga ale matagaluega outou tu’i le mulipapaga ma fai faiva o Fe’epō ina ia tini ma tau lau o le fa’amoemoe o alo ma fanau nei. Fa’amalo tapua’i, fa’amalo lagolago i taumafaiga a nai fanau.