18 Tesema 2024 Samoa: Ua tauaaoina e le Falema’i Nifo i Malietoa Tanumafili II i Tuasivi se foa’i taua o masini fai nifo mai le Ekalesia a Iesu Keriso o le Au Paia o Aso e Gata Ai.
O lea foa’i e aofia ai nofoa fai nifo fou e lua, fa’ata’ita’iga, iunite -x-ray, se compressor, ma isi mea faigaluega taua
E tusa ma le 140,000 tala le tau atoa o lenei foai na agalelei ai lea Ekalesia.
I le sauniga na faia i le Aso Faraile na te’a nei, na faaalia ai e le Minisita o le Soifua Maloloina Valasi Luapitofanua To’ogamaga Tafito Selesele le agaga faafetai i le Ekalesia ona o le faaauauina pea o le lagolagoina o le soifua maloloina o Samoa.
Na ia fa’ailoa o lenei foa’i o le a fa’aleleia atili ai le tautua ole falemai nifo mo tagata uma o loo ile motutele I Salafai.
O le susuga i le faafeagaiga ia Fiafia Toleafoa o le Ekalesia Faapotopotoga Kerisiano Samoa na tatala aloaia le masini fou, o le tipiina o le lipine e faailoga ai le faamoemoe. Na faafetaia e le Minisita o Selesele le Ekalesia ona o le agalelei ma faamalosiau i le aufaigaluega a le falemai ina ia tausia lelei meafaigaluega fou ina ia mautinoa e manuia ai le atunuu i tausaga o lumanai.
