E iai tagata o loo maua i le tino gagase ma le fiva , ae o loo togafitia lava ile fale.
Peita’i o lea ua aumai le faalauiloa faalauaitele a le Matagaleuga o le soifua maloloina, i tulaga ma foliga mai o le faamai ole Dengue Fever i Samoa.
Ua faamaonia mai e le fale suesue, le faateteleina o tagata ua maua ile siama ole Dengue talu mai le Fepuari ile amataga ole masina lenei o Mati.
O le tele o tagata aafia, na asiasi atu ile falemai tele ole Tupua Tamasese Meaole i Motootua.
Ile faamatalaga faalauaitele mai le Matagaluega, o loo faaauau ona mataitu tulaga vaaia o le siama ma tagata aafia, ma faalauiloa mai lava ile atunuu, i nisi tulaga e oo atu iai.
Peita’i ua faamaonia mai foi, le toe tolopo ai o le asiasiga a le aumalaga faapitoa mai Amerika mo le lotoa a le Toomaga I Tuana’imato, ile afiafi ananafi, talu le puipuiga lava ole soifua maloloina.
Ma saunoa ai le sui ole pulega, ua tapunia ai le lotoa mo asiasiga talu mai ananafi, mose taimi le tumau, ona o faaeteetega ile faama’i ole dengue fever.
Ole Dengue Fiva e afua mai le siama vairasi, e feaveai e namu i tagata. E taatele lava i atunuu mafanafana ole teropika e iai Samoa ma isi atunuu o le Pasefika. Ole tele o tagata e maua ile siama, e faaleiloa lava ni auga, ma toe malolosi ile lua vaiaso.
O auga e aofia ai le vevela, ulu tiga, tiga tuamata, tiga sooga o ponaivi ma maso, faafaufau, pua’i, fulafula faamama ole tino, ma le pata ole tino.
E iai isi auga ile uma ane o le vevela, e iai le tiga o le manava, faauau ona suati, vave le manava, toto mai tainifo, poo le isu, faapalupe, faigata ona moe, filogia le suatiga ma feau mamao, ma le auvaivai.
O fautuaga masani lava , ia vaai se foma’i pe’a ua iai ni masaloga I auga o taua I luga, ma faamama le siosiomaga, aemaise o nofoaga e tuufua ai namu e togafiti.
