Ua faamauina e le Pulega o tagata maimoa mai fafo le siitia maualuga o aiga ma uo i atunuu i fafo, e asiasi mai i Samoa i soo se masina o le tausaga, ona o faalavelave faaleaiga, fonotaga ma Aso faamanatu.
Peitai o le Aso muamua lenei o le taimi muamua foi lenei ua faataunuu ai se tasi o a latou faalauiloa na faatino lea i totonu o le aso 1 o Aukuso o le tausaga lenei seia paia le aso 31 o Aukuso.
Moi latou uma sa malaga mai ma toe foi i le piliota pei ona taua i luga sa faamaumau o latou suafa ma faatino ai se sei.
E toa 64 i latou na mafai ona faamauina o latou igoa mai atunuu e pei o Niusila, Ausetalia ma Amerika Samoa, ma faataunuuina ai ai loa le sei, pei ona manumalo ai le tamaitai ia Lexene Jane Treadwell nai Niusila.
O le faailoga pei ona tapenaina e le Pulega o turisi, o le toe foi mai lea o le ua manumalo i Samoa na nofo i le taumeasina mai le masina o Ianuari ia Fepuari o le tausaga fou.
Saunoa le sui o le maketi o le Pulega o Turisi le afioga ia Taimalelagi Tutuila Farao, o le faanaunautaiga o le Pulega o turisi ia unaia i luga le fuainumera o turisi e asiasi mai Samoa ma nofoia o tatou fale talimalo ma faleaiga.
Ia o gatasi ma le maualuga o le fuainumera o aiga ma uo o loo asiasi mai pea i Samoa i masina uma ma nonofo i o tatou lava aiga.
O le naunautaiga o le Pulega o turisi ia faaauau pea le faalauiloa lenei a le pulega o turisi ma ia mataitu pea tagata feasiasi mai i totonu o Samoa.