Sili aoao le tamaitai Samalaeulu i le mataupu palama

SHARE NOW

O le lua ai nei o tausaga sosoo o maua lava e le itupa o tamaitai le ipu o le faauluuluga o le mataupu palama a le aoga matata eseese i Don Bosco.

E pei ona faamauina ai le tausaga lenei 2023, ua sola ma le tamaitai o Menorah Asomuamua, 19 tausaga le matua mai Samalaeulu i Savaii le ipu o le sili aoao o le palama 2023.

O le vasega palama i faamaumauga mai le alii pule o le aoga i Don Bosco le susuga ia Fonomaitu Mane Su’a, na amata mai le tausaga e toa 19.

Peitai e oo mai i le ogatotonugalemu o le tausaga ua totoe le toa 14, ae e lamalama faaiu aoaoga o lenei tausaga ae faamavae le isi toalua.

Ma totoe mai ai le toa 12 lea ua faauu ma le manuia a latou aoaoga, e toa 3 tamaitai ae toa iva alii.

Peitai o le tala fiafia mo le aiga o le tamaitai na faauluulu iai le vasega palama i le tausaga lenei, olea le toe tau sailia sana galuega, ina ua tali mai le Pulega o le Suavai, ma ua maua ai lona avanoa faigaluega mo le tausaga fou.

Tautino Menorah sa matuai le faigofie lana savaliga i lenei tausaga aua e fai si taugata o le pili, ae sa iai lava sina fesoasoani mai le laumua faatasi ai ma le lagolago a ona matua ma lona aiga.

“Faafetai le Atua mo le poto ma le atamai ua mafai ai ona faaiuina ma le manuia aoaoga lenei tausaga, ae e le uma ai pea le fia tautua i totonu o le laumua,

“Ua fiafia lo’u aiga, fiafia ou matua, ia ma o lea finau foi faigaluega i le Pulega o Suavai lea ua tali mai ua maua ai foi le avanoa faigaluega,”

O loimata o le fiafia a ona matua ma lona aiga mai Samalaeulu Savaii na auai uma e molimauina le faamoemoe, ma le taunuuga o aoaoga a Menorah Asomuamua.

O le tasi nei o mataupu sa na o alii na tele ina agavaa ai, peitai o le taimi nei ua siitia lava le fuainumera o tamaitai ua mafai ona maua tusipasi ma agavaa ai.

“Afai e mafai ona fai e alii e mafai foi e tamaitai, o le upu faasamoa, E au le inailau a tamaitai, o le faamalosiau mo nai ou uso, ia finau iai tatou te mafai uma lava”