O le lona 35 ai lenei o aso talu ona pepesi i tua mai o nofoaaga faanofoesea siama o le koviti, ae silia i le ono afe tatou tagata ua pisia.
Ae ose molimau lata mai o le tulaga ua iai Samoa pei ona fofogaina mai e lana afioga i le Palemia Fiame Naomi Mataafa ,
“tulaga lata mai ua iai le faama’i, ua faamauina le oo atu i le 45,696 le aofa’i o suega mo le Koviti ua uma ona fai. Mai nei suega ua faamautu mai ai, ua 6,246 i latou ua aafia talu mai le aso 17 o Mati na sao mai ai i tua le faama’i. 63 na maua na ua ulufale mai ile atunuu. 6,305 le aofaiga o tagata ua aafia ile siama. 15 o loo faanofo esea i tua, ae 4 o loo taofia i potu tigaina. 120 na taofia ma tete’a i tua ua manuia, ma le toatasi ua maliu i le 48 itula talu ai, ma atoa ai le 13 oi latou ua maliliu.”
Mai le 13 i latou ua maliliu o lo faamauina o tagata matutua lava o loo mafuli iai le aafiaga , iai latou e iai gasegase tumau.
E iai le tina matua , ua silia i le 90 tausaga le matua o le soifua, ua faitau masina talu ona uma lona tui muamua. Peita’i o le mafatiaga lea ua feagai ai ma lana fanau, ona ua fiu tamaiti e toe tauanau le tina matua lea e o e fai lona tui, ae musu. Ma saunoa ai lona alo o latou mafuta, tofa a Falefata Nari, ua uma faaoleole e fai i lona tina, ua matua musu lava e fai lona tui lona lua, ma sona booster . Ma ua toso ai nei le latou pa mai tauaiga e fia asiasi atu iai talu puipuiga ole tina matua lenei e musu e fai ona tui, ae o le faaeteetega talu e iai foi ona gasegase tumau.
Ae o le faalauiloa a le afioga i le palemia, o loo faaauau ona tulituli a tatou tuiga mo latou uma e agavaa iai.
