O le aso faraile na te’a nei 09 o Tesema 2022, ua faamau i tala faasolopito o le toa 108 o alii ma tamaitai faauu ole Kolisi ole aoga Tusi Paia a le Rhema i Samoa.
Na tatou molimauina ai le faauuga o le to’a 42, 1st yr, 37, 2nd yr, 24, 3rd yr, 5, 4th yr talu ona a’o ta‘uina i le Upu a le Atua.
O se vaega oi latou na o ni Faifeau tausi nuu na toe a’o ta‘uina , aua le sailia atili o le malamalamaaga i mataupu silisili, (theology) talaaga faa le tusi paia (biblical context) aemaise le loloto o le suesueina o le Afioga Paia a le Atua i mataupu pei o le valaauina, faaperofetaga, vavega, faaaliga, aoaoga, faaauau o le feau faa talalelei, ma nisi.
O le susuga i le A’oa’o ia Ofeira Olo, mai le Afioga o Vailuutai, o se tasi lea o tamalii na faauuina i lona tausaga lua, ile tatou faatalanoaga, na ia faailoa, le tele ma le taua o le ola aoaoina, ma le malamalama ai i le Afioga a le Atua, aua ua faasa’osa’o ai lona lava olaga.
E le gata i le va ma lona toalua, le faletua ia Falefa, le va ma le fanau, ae o le iloa ai ona ola mata’u, e tusa ma le fetalai mai o le Atua i lana Upu.
Na ia saunoa foi ile taua tele i le tagata galue, ona iloa usiusita‘i i ta’ita’i, (submit to leadership) e le gata i auauna totofi a le Atua, taitai o galuega, Ekalesia, nuu ma le atunuu.
Na tatou fesiliga se faamoemoega o le susuga ia Ofeira ma le faletua, mo le lumanai, ae tali Ofeira, o le faamoemoe,
1) ia muamua ona malamala i Afioga Paia a le Atua,
2) iloa ona aoaoina muamua ia ma lona toalua ma le fanau, e tusa ma taiala mai le Upu,
3) ma faaauau pea ona saili i le finagalo o le Alii, a o fuafua ai e faaauau lona tausaga tolu i le Aoga i le tausaga fou.
O le faamalosi a le susuga i le A’oa’o Ofeira, mo alo ma tupulaga o le atunuu, e leai se isi e le Aoga i le Atua, na filifili lava i tatou a oi le manava o le Tina,… o le taimi e liliuese mai ai ma le faamaoni le tagata mai le leaga o le lalolagi, ae ofoina ma le ato‘atoa le olaga e auauna ai le Alii, o le tagata manuia, o le aiga, ma le fanau manuia foi lea.
E momoli atu ai ma tatou faamanuiaga i alo ma fanau uma na faauuina, aemaise le tapua’iga a matua, aiga, susuga i Faafeagaiga, faletua i Ekalesia e fia, ma ia maua se KIlisimasi fiafia ma se tausaga fou manuia.
