Ua siliga lava sailiga a le Matagaluega o leoleo ma le afioaga o Pu’apu’a Savaii mo le tama ia Olo Tautulei lea ua atoa le masina o e lei toe foi ane mai lona faiva sa alu.
Ma maitauina ai le aso Toanai o le vaiaso ua mavae le aso 26 o le masina lenei o Aukuso na faatino ai loa e lona auaiga ma le afioaga o Pu’ap’ua se sauniga lotu.
Molimau mai se tasi o lona auaiga, na fai molimau i uta i lona maota i Puapua lava na auai uma ai faafegaiga o le afioaga ile maea ane na agai uma ane i tai le sami ma faatino ai toe sauniga pei o le faatafea o teu ma fugalaau e aualofa ai i le tama o taua i luga.
Ae na toe faaiu ifo i uta ma faatino ai loa faaaloaloga pei ona masani ai soo se maliu ma faalavelave faasamoa.
O le tama ia Olo Tautulei na lipotia mai e le afioaga o Puapua i le aso muamua lava, 10 o Aukuso na faagasolo ai sailiga,ina ua le toe foi ane mai lona faiva.
Na aso atoa ai tupulaga uma o le afioga ma galulue faatasi ai ma le matagaluega o leoleo e faatino le sailiga ae toe tasi lea o le aso aulia le aso faailogaina o tama.
Peitai na toe lipotia mai e le afioaga i le aso lona lua o le sailiga ma faailoa mai e na o le tao fagota a Olo na latou maua ane ae o isi mea fagota e lei maua e aofia ai ma lona tino.
Na tatou molimauina le tumutumu o toe sauniga o le tama na tapenaina e lona tausi ia Petesa Olo Tautulei ma fanau a lana fanau.
