Ua faamautinoa mai le aafia o le auaunaga ase vaega o pisinisi o loo gaosia panikeke ma kekepuaa, talu le sioki o le falaoamata.
Faamaonia mai e tatou paaga i le maketi, o le ogaoga o le sioki o le falaoamata i Upolu nei, ma totoo ai sailiga i Savaii, ile vaiaso nei, ma maua mai nai tagata e faaauau le auaunaga.
Ae o lesi tatou paaga i le maketi na maua mai lana ia taga falaomata mai faleoloa o Saina i tua atu o le taulaga.
E tasi lava le mafuaaga o le sioki o le falaomata i Samoa o le faatuai mai o Vaaoloa. O maua poo le masina fou e tatau ona oo atu iai ua taunuu mai sesi vaa faaola.
O faafitauli nei tau i le sioki o taumafa, ua fetaitoinai tonu lava ma le mau o loo tauave nei e le Matagaluega o faatoaga ma faigafaiva.
Ia toaaga e toto faatoaga, aemaise o taumafa e vave ona selesele pei o e manioka , umala, ufi , talo, taamu, fa’i, fualaau aina, lafu moa ma meaituaolo.
Ole mau tauave foi lena lea na sau ai le malo a le HRPP, i le taumafaiga mai e toto ia lava taumafa, ma sa avea ai Samoa ma atunuu muamua i le tatou itulagi na ausia le sini lona lua ole Meleniuma o le lava o taumafa.
Ae o le taumafai ia maua lava oloa i Samoa nei, na afua ai ona la’u mai manupapalagi pei o povi ma mamoe, ma manuia ai lava na’o aiga e lima malolosi e gafatia ona faatau.
Peita’i o ta’ua e le tatou paaga mai totonu, ole taua lea o loo faia i le va o Lusia ma Ukraine, ua aafia ai le lalolagi atoa, ona o le suauu sapalai e mafai ai e vaa ona feoa’i, ua matua siitai lava i luga le tau, ma faapena foi ona siita’i ai i luga ma le tau o soo se oloa ile lalolagi atoa, ma molimauina ai nei ile tatou atunuu.
