8 Ianuari 2024, Samoa: Ua amata le tausaga galue mo tagata faigaluega a le malo.
Faapena foi mo le pulega o le malo o iai nei , i lalo o le pulega a le vaega faaupufai a le FAST.
Pei ona faia ai le feiloaiga a le Faafaletui a le FAST ile afiafi ananafi, ile afioga ile Palemia ma lana faigamalo, i Minisita o le kapeneta ma faipule o itumalo.
Vagana ai faipule e to’alua e le’i auai ona o lo o malaga, e aofia i Harry Schuster ma le afioaga a Laumatiamanu.
E le’i maua se tala aloaia mai le pulega o le Faafaletui, peitai, o taua e le tatou paaga e iai lona sootaga lalata i totonu o le pulega o le malo,
Ole fono e silia ile ono itula o fale mataupu taua mo le aga’i i luma ole malo ma ana tapenaga o lenei foi tausaga galue.
Sa talitali le toatele ile taunuuga o lea fono, ise tali a le afioga ile Minisita ia Laaulialemalietoa, talu na mama mai i fafo faatalanoaga a le Kapeneta I lana fono ile amataga ole vaiaso nei.
O na tala mama mai i fafo mai le kapeneta, na agia ai le ave e le Palemia fautuaga, e faamavae poo le aveese ma le tofiga Minisita.
Sa le maua se tatou avanoa ile Susuga ile Laaulialemalietoa, peita’i o le isi fono a le faafaletui lea na faia ile afiafi ananafi.
Ua avea ma auala e toe fale ai mataupu o loo manaomia ona faaleleia atili ai le faigamalo ma le taitai a le FAST o Samoa.
Ole tusi na tuuina atu ile tamaitai Palemia, na fuli iai le manaoga o le faafaletui, e lagolagoina le Susuga a Laaulialemalietoa.
Peita’i o lesi la’asaga o iai nei ole faasee loa o le vaa o le malo e faaauau ana galuega masani ai, pei o atina’e mo le agai i luma.
Ua tatalo atu le vasega o tusitala ile failautusi a le ofisa o le Palemia, mo se feiloaiga aloaia a tusitala ma le Palemia ise taimi lata mai. Ma o le’a fesiligia ai i tapenaga a lana faigamalo mo le nei tausaga galue.
