O loo tumau lava tapu poo le faasa lea o le faapapa o faga ofe, poo faga paipa poo faga apasusu.
Ua faailoa mai e le ofisa o leoleo, ina ua tatou fesiligia.
E ui ua oo i le vaitau o aso fiafia, ae o loo tumau pea le sa ona faia o le faasoesa, ole solitulafono le faasoesa, malomaloa, e aofia ai ma le faapapa o fana ofe.
O meaataalo ia sa masani ona fiafia ai fanau tama, e ta le ofe fiti pe lima inisi le lapoa ole tino, lima futu le umi, ona faapu uma lea o pona vagana le pona pito i tua e poloka mai ai le kalasini, vane ma le tamai pu afa inisi faatafafa ile va o pona e lua pito i tua, sasa’a iai le afa ipu kalasini ma feula iai se aloi afi, feula ia maua le asu i totonu pe faalima ona feula iai aloi afi ia maua ma lava le asu e taai ma vevela ai totonu o le ogaofe fiti lea, e amata loa ona pa pasi.
Ua tatau foi ona faaetete le au tutu, e feula ma soso ese foliga mai le pu ole faga pe’a tuu iai le aloi afi, e maua ai le pa feololo ma toe feula ma tuu iai se isi aloi afi e faasolo atu lava ina pa leotele ai ma faaauau ai lava, ona auauai iai tamaiti e feula le asu lea, ma tutu iai le aloiafi, ma saga faapa ai lava , ma malomaloa, pei ona molimauina mai e aiga i Vailima lea ua amata mea ai faapapaga fagaofe.
O lesi metotia lea ua faaaoga nei e vave ma sili atu le pa leotele, o atigi apa susu e ono atigi apa e faapu ta’i kuata inisi muamua pito i lalo ona sosoo faatasi lea o atigiapa ia e ono i tape.
Ole fana lea ua faaaoga ai le penisini poo le kesi taavale, e spray tasi lava i totonu, ona lulu lea ole fana ia taape le kesi, tuu iai le aloiafi mai le tama’i pu pito i tua ma pa salalau e sili atu ona leotele nai lo le fana ofe.
O lesi fana sa fausia mai ogapaipa lima inisi le lapopoa ae pe ono futu le umi, sa lalago ae tafu ane lalo e faavevela ma faaaoga iai le kalasini pei lava ole fana ofe. o le fanapaipa, e galulu ma taalili lana pa, e sili atu ona faamalomalo a.. ae e le umi se taimi e ‘ote ai le fana paipa, aua e maalili loa ona malolo foi lea o le au feula asu.
E le’o mautino poo se fana ofe, poo se apa poo se paipa le fana lea na faamalomaloa ai ile aoauli o le aso Lua i Vailima, ma molimau mai aiga i le vaiaai o iai le amupsaa a Saina, o le taalili e sau mai luga e le gata ina tau faamata’u ae o le leai se malologa e maua.
Na ta’ua mai e le vaega o auaunaga lautele a leoleo, ua faia iai le latou sailiga ile aiga e ana le fana. Ae ole solitulafono le faamalomaloa.
