Ua faamaonia mai e le Sui Komesina ole Matagaluega o Leoleo ma Falepuipui, Susuga Papalii Monalisa Keti, le faasee ane ai o le suesuega o faia e leoleo ile maliu faafuasei ole tamaitai Pule o le Ofisa faasalalau o le TV 3, Aotearoa Pesamino Myers mai Faleata i le ofisa autu i Apia.
E le’o iloa tonu le aso male taimi na maliu ai , peita’i e masalomia o le faaiuga o le vaiaso na te’a nei. Na faato’a logo leoleo i le taeao ole Aso Gafua 23 Ianuari 2023.
Saunoa Papalii, ole mataupu lea “na amata mai e le Ofisa o leoleo i Faleata, peita’i ua faasee ane nei ile Ofisa autu o leoleo i Apia CID mo le suesuega i le mafuaaga o le maliu faafuasei. E le’o iloa ai foi ile taimi nei, pe faia se taotoga faapitoa.”
Talu o loo faagasolo pea suesuega a leoleo, pei ona saunoa Papalii, “vagana ua uma ane, ona tuufaatasi lea ma le lipoti a le foma’i.
E avatu ai se lipoti ile pule o Maliu poo le Faamasino, Coroner mo sana faaiuga, pe talafeagai ai ona faia se taotoga o suesuega faaletulafono i le mafuaaga o le maliu.”
Ae mo le taimi nei, e leai se isi ua molia pe masalomia i le maliu . O molimauina foi e leai se gasegase tumau e maua ai le tamaitai.
O le maliu faafuasei, o le afioga a Aotearoa, na faateia ai foi le pulega o le Leitio Polensia ma le TV 3, ma ose faanoanoaga i le tamaitai Pule ole Leitio Polenisia, Afioga a Papaliitele Olga Keil, pei ona ia tusia ile feau faanoanoa ile taeao ina ua maua le tala, ua maumau lenei tamalii faagalo gata, i lona sao taua, e ala i lana auaunaga.
O le tamaitai pule o le TV 3, sa amata galue mai le Leitio Polensia ma le TV3 i le masina o Aukuso 2015.
Na soifua ane, aoga ma nofo i Amerika i le tele o lona soifua, ae mulimuli ane fo’i mai i Samoa ile tusa o le fitu tausaga talu ai ma avea ai o se itutino o le aiga faasalalau a le letio Polensia.
O loo taoto ai nei lona tino maliu ile falemaliu ole TTM i Motootua, e talia se faiuga o le suesuega a leoleo ma le foma’i, pei ona saunoa le sui Komesina, o leoleo, susuga Papalii Monalisa.
