O le uma ane o aso fiafia, ae amata loa ona le toe maua se ava malosi pei o le taula i faleoloa.
Peitai ua faamaonia mai e le Sui Komesina o le Matagaluega o Leoleo le susuga ia Papalii Monalisa Tia’i Keti i le feiloaiga Muamua o lenei tausaga ma Tusitala, le toe faatau ai o ‘ava malosi sa matuai faasa e le Komiti o Ava Malosi ona gaosi ma faatau i totonu o le Atunuu.
O se itu na faailoa e le Sui Komesina le faatei’a ai o le Matagaluega, ma ua faasolo suesuega a le Matagaluega o Leoleo poo fea tonu lea na sapalai mai ai nei ava malosi.
“O i e atagia mai ai o lea e faaaoga ele atunuu ‘ava malosi ua faasa, pei ole rice vodka ma le boom vodka, o lea lei faamautu mai poo fea tonu lea supply mai ai , mo le tou silafia ua leva ona faasa mai e le board ona toe faaulufale mai Samoa,”
O le tausaga talu ai ia Aperila na taofia tumau ai e le Komiti o Ava Malosi (Alcohol Control Board) le gaosia ma le faaulufale mai o soo se ava malosi i le ituaiga lea e iai le Boom Vodka, o le Rover ma isi, ina ua maua i suesuega a le Komiti le tele o vailaau e aafia ai le soifua maloloina o tagata, pei o aafiaga o le mafaufau, ma e leai ni pepa (label) o faamatalaga poo le a tonu le pasene o le ava malosi, ae poo a foi vailaau (ingredients) eseese o loo tuu i totonu o nei ava malosi.
Saunoa Papalii, e lē mafai ona lilo ma natia lenei mea, ua ave foi le faamuamua a le Matagaluega ia’i latou ua gafa ma le suesueina o le na mataupu.
