14 Jan, 2025 Samoa – O le ‘a fa’aauau ai ona nofoia nofoa ole kapeneta ile aso, ile mae’a ane ai ona faatauto minisita fou e to’afa.
O le suiga fou lea mo minisita ua faatete’a I lalo o le faaiuga faitoatasi a le afioga ile Palemia e tusa ai ma le tulafono faavae.
O le 11 ile taeao ole aso le sauniga o le faatautoga ile maota o le ofisa o le ao o le Malo i Vailele.
O a latou afioga e aofia ai, Niuava Malolo Eti, Lagaaia Tufuga, Mauu Siaosi Puepuemai, ma le Faleomavaega Titimaea.
Peita’i ole faatete’a ai o ulua’i minisita e toafa, ose suiga na taunuu iai le iloiloga a le tamaitai Palemia, ina ua leai se faatuatuaga o le va galulue faatasi ai o minisita sa iai e tolu, ma le afioga ile palemia, afioga ia Mulipola Anarosa Ale Molio’o, o le Minisita o Tina ma Tamaitai, Leota Laki Lamositele o le Minisita o Pisinisi, Alamanuia ma Leipa, Poumulinuku Onesemo, o le Minisita o Fesootaiga ma Faamatalaga Tekonolosi.
O le Susuga ile Laaulialemalietoa Polataivao Fossie Schmidt, ua faate’a ona o moliaga o loo faia e leoleo faasaga ia te ia e sootaga ile maliu ole tama aoga Iunivesite aoao, Tuuau Maletino.
O le faatautoga e faia e lana afioga ile Ao mamalu o le malo tutoatasi o Samoa, Tuimalealiifano Vaaletoa Sualauvi ll.