O le naunautaiga o le aiga sa Muamua mai Luatuanuu ia fesoasoani e faamuta le tino puta, ma fai meaai taumafa ma fualaau, o le auga lea ua atoa ai nei le 3 vaiaso o faia pea a latou faamalositino ile maea o galuega i aso taitasi.
Na ta’ua e le sui o le aiga le susuga ia Vaelei Aviu, “e oo mai le taimi nei o loo lagona pea le tiga ma le faanoanoa ona le maliliu o nisi o le aiga, e afua mai i gasegase sa mafai lava ona foia, pei o le tino puta ma le toto mualauga, ae o le faafitauli sa lei mafai ona maua se avanoa e faia ai se gaioiga poo se faamalositino foi”
Ma tonu ai ile matai o le aiga Muamua atoa i Luatuanuu le tofa ia Mapusua Tovia Taateo o loo taitaia le polokalame, e auai uma le aiga amata mai i matai matuatua, aofia ai ma le au faigaluega seia oo i fanau, e faatino se faamalositino i afiafi o aso taitasi pea manava galuega.
Saunoa Vaelei o le faaiuga o vaiaso taitasi poo aso Toanai a maea ona faia le faamalositino ona faasolo uma lea e fua le tata o le fatu, fua le suka ma kilo ua mafai ona toesea e tagata taitoatasi.
A fua atu o loo faatupu laia kilo poo tumau pea, ona ao lea o tai 5tala mo le ua faamaonia ua mafai ona toesea kilo mai lona mamafa sa iai ile amataga pea maea le 10 vaiaso.
Na taua e le sui lava lea o le aiga, “o le aso muamua lava sa fua ai latou pauga e toatele lava sa i luga atu o le selau kilo, peitai e i lalo mai o le 30 tausaga, ma o le naunautaiga ile aiga ia maea ane le 10 vaiaso ua iai se suiga.
Molimau Vaelei ua iai foi nisi o le afioaga o Luatuanuu ua auai, latou te leo vaoia ai le fia auai atu o soo se tasi.
Ma o se faamalosiau lea i lona aiga pea mafaufau atu i tagata o le aiga ua maliliu ona o le le lelei o le tausiaina o le soifua maloloina.
Saunoa Vaelei, e le manaomia se agai ile gym poo faletaalo mo faamalositino e tele foi se seleni e sefe mai pea agai i faletaalo e totogi le tupe ma faaoga.
Ae o faataitaiga lelei lea mo le mamalu o le atunuu ina ia faaitiitia ai ma taofi le tino puta ma nisi o gasegase e mafua mai i le tausisia lelei o le soifua maloloina.
