“E malu faamatalaga a le atunuu mai le komiti o lea galulue e tuu faamatalaga taua o tagata i le ID?”- Fonotoe Nuafesili Pierre Lauofo.
E tolopo taualumaga o le Fonotaga Aoao Faitulafono a le Palemene ile aso ananafi ua maea ona folasia e le Minisita o le Matagaluega o Tina ma Tamaitai, Atinae o Afioaga ma Aga Fesootai le afioga ia Leota Laki Lamositele.
Le tulafono taufaaofi o le pepa faamaonia faatekonolosi poo le ID e iloa gofie ai tagata Samoa 2023.
O lea ID o lea mafai ona tuu uma iai faamatalaga taua o soo se tagata nuu o Samoa e faaaoga i soo se auaunaga.
E pei o fefaatuaiga o oloa, fesuiaiga o tupe, faatinoina o le palota, sailia o faamaumauga tau soifua maloloina, aoaoaga ma soo se auaunaga e manaomia vave.
O le isi aoga o lenei ID pei ona saunoa iai le Minisita o lea faafaigofie ai ona faamaonia le aofaiga o tagata i totonu o nuu ma alalafaga pea faamatuu atu fesoasoani a le malo aemaise o paaag mai fafo mo le manuia lautele o le atunuu.
Peitai e silia ma le toalima faipule o le palemene na faaleo o latou finagalo e sootaga ma le tulafono ua folasia, ma maitauina ai se popolega tele o loo aofia mai o latou finagalo faaalia.
Pei ona saunoa iai le taitai o le ituagai i totonu o le Palemene le afioga ia Fonotoe Nuafesili Pierre Lauofo i sona popolega e agatonu ile Komiti olea gafa ma le tuufaatasia uma o faamatalaga o le mamalu o le atunuu i totonu o lenei ID.
“E tatau ona faia se latou faatautoga faapitoa ina ia faia ai ma le faamaoni lenei galuega ma’alea’le nei mea ane ua latou faaogaina faamatalaga o soo se tagata e faia ai ni gaioiga sese ma le solitulafono pe liki ai foi tua faamatalaga poo private information o tagata o loo puipui iai”
O le poloketi lea pei ona saunoa iai Lauofo o se tasi lea o taumafaiga a le faigamalo ua mavae, ma sa umi se taimi o tau faagasolo lona faatinoina ona e le faigofie.
Peitai o le malu puipuia ma le saogalemu o faamatalaga taua uma o le tagata olea tuuina i totonu o lenei ID o le popolega tele lea i manatu o sui usufono o le palemene na folasia.
